كود الرباط//

نزار بركة، الامين العام لحزب الاستقلال، لي مخدم شركة تواصل ديال فرنساوي شاد ليه تواصل الوزارة والحزب فالانتخابات وبعض وزرائه، باقي كيحلم يكون رئيس حكومة المونديال.

بركة لي بدا التنافس بكري بالهجوم على الحكومة لي هو عضو فيها بالصفة الحزبية وبالصفة الوزارية (وزير التجهيز والماء لي هو اضعف وزير مر فهاد القطاع بشهادة أطر ومهندسي قطاع الماء)، باغي يروج بلي غادي يتسقطب لاعبين كبار ومهمين للمنافسة الانتخابية.

بركة لي كيهاجم كبار المستوردين من جماعة ولاد فرج، لي كيترأسها استقلالي ورثها عن باه كيف ورث البرلمان من باه. هكا الاستقلال كولشي بالورثة من علال لعباس لنزار.

كولشي عارف بلي حصيلة بركة ضعيفة بزاف، وتدبيرو لقطاع الماء فشل فيه.ويلا درنا مقارنة مع زعماء الاغلبية لي شادين قطاعات فراه هو الفاشل، مثلا فالحصيلة الحكومية، مقارنة مع المنصوري، لي كان عندها برنامج دعم السكن المباشر، واخا حاربوها حيثان العقار ولكن استطعت تنزل الدعم بتدرج وبشهادة من رئيس الحكومة. وقبل منها عبد اللطيف وهبي وزير العدل، داير ثورة تشريعية فوزارة العدل.

نفس الشيء لعدد من الوزراء الاخرين لي مافيهمش الهضرة بزاف، لكن وزراء الاستقلال هم الحلقة الاضعف. لا حصيلة ولا تواصل من غير “صفقات السيارات وتوظيف المقربين” وهادشي ماشي غريبة على حزب معروف ب”اللفهة” وكيموت على الكرسي.

نجيو لاستقطاب الشماخ، لي كيروجو غايرشحو ف شيشاوة، وهنا نذكرو اسي نزار بلي يلا بغا الشماخ يطلع فديك المنطقة فراه كولشي بيد المهاجري لي معروف كيفاش كيتحكم فالخريطة الانتخابية فديك المنطقة، لدرجة عشرات رؤساء الجماعة ديالو محسوبين عليه واخا يكون كينتميو لاحزاب اخرى.

المهاجرين عندو كذلك برلمانيين ديالو محسوبين عليه. يلا كان نزار تافق مع المهاجري باش يطلع ليه الشماخ للبرلمان فهادي ممكن.

هاد التحركات ديال نزار كتشبه تحركات أرنب سباق في المارثونات (أرنب السباق هو من يفتح الطريق لفوز الأبطال الحقيقيين، وهو لذلك لا يكون عادة ضمن العدائين المتوقع فوزهم).

الاستقلال، وفق مصادر فالاغلبية، فراه “خوا” بالتحالف الثلاثي فعدة جماعات ودار انقلابات على رؤساء جماعات ومجموعات الجماعات في عدة مناطق.