كود الرباط//

منذ انتخاب عبد الحكيم بنشماش، لرئاسة مجلس المستشارين، بانت عدة مؤشرات كتقول بلي خريطة التحالفات الحزبية والسياسية غاتبدل لبزاف الاسباب منها الانتخابات ديال 2021، هنا كاين لي كيقول بلي شي أحزاب غاديا تندمج فبعضياتها وكاين لي كيقول بلي شي أحزاب مهددة بالانقراض حيث شعبية ديالها هابطا بزاف.

بالنسبة لحزب الاتحاد الدستوري، لي هو عندو مقاعد قليلة في الأغلبية الحكومية، كاين لي كيقول داخل الكواليس السياسية بلي غادي يندامج مع الأصالة والمعاصرة.

العربي المحرشي، أحد مهندسي القرار السياسي في حزب الأصالة والمعاصرة، قال لـ”كود” :” مكاينش اندماج ولكن عندنا اصدقاء فالأغلبية الحكومية وتنسيق باستثناء العدالة والتنمية لي هو معزول سواء داخل الأغلبية أو خارجها”.

الكلام ديال المحرشي، كيتوافق مع كلام عبد الله الفردوس، القيادي في حزب “الاتحاد الدستوري”، لي قال لـ”كود”: ” هادشي ديال الاندماج مكاينش ومعمرنا فكرنا فيه”، مضيفا :”لي معه تنسيق دبا هو التجمع الوطني للأحرار فالفريق البرلماني”.

طبعا بالنسبة للفردوس، كيقول بلي كاينا أحزاب كيجمعها التوجه السياسي الموحد، :”حنا كحزب يميني كنتحالفو مع احزاب لي كتشترك معنا فنفس التوجه”.