گود سبور//

علاش الاتحاد الأوروبي لكرة القدم، مازال باغي يقاطع كاس العالم ومنافسات الاتحاد الدولي لكرة القدم؟ واخا الفيفا تراجعو على مشروع تحويل المونديال لشركة، ودارو اعتذار فبلاغ رسمي لجميع الاتحاد القارية والوطنية، ولكن الاتحاد الأوروبي من دونو من دون الاتحادات القارية مازال داير المقاطعة وكايطالب برحيل السويسري جياني انفانتينو من رئاسة الفيفا.

اي متتبع لهذا الصراع ما بين الاتحاد الأوروبي لكرة القدم والاتحاد الدولي لكرة القدم برئاسة جياني إنفانتينو، وإعلان الجهاز الكروي الأوروبي مقاطعة كاس العالم ومسابقات الفيفا حتى يمشي جياني انفانتينو، غادي يطرح سؤال واش الاتحاد الأوروبي لكرة القدم ما خايفينش على مصالح العضوين ديالو إسبانيا والبرتغال فتنظيم مونديال 2030 والعقوبات اللي ممكن يتعرضو لها فرضا إلى قاطعو المنافسة فحالة بقى انفانتينو فرئاسة الفيفا لولاية جديدة؟ ولا هذا الشي كامل هو مناورة من الاتحاد الأوروبي وضغط على الفيفا ورئيسها باش اسبانيا تنظم فينال مونديال 2030 فمدريد؟

كلشي متبع حاليا الصراع والمنافسة القوية بين المغرب وإسبانيا على تنظيم فينال مونديال 2030، ضمن التنظيم الثلاثي المشترك مع البرتغال، وهذا الشي ما يمكنش للمتتبع ما يربطوش بالصراع اللي واقع بين الرئاسة الحالية ديال الفيفا والاتحاد الأوروبي لكرة القدم، واتهام الأخير للاتحاد الدولي بتكديس الفلوس على حساب الكورة، وانهم غادي يبقاو مقاطعين مسابقات الفيفا وفاقدين الثقة فجياني انفانتينو. والسؤال هنا هو واش هاد الجهاز الاوروبي فعلا كاتهمو الكورة والجمهور والشعبية ديال اللعبة وانها ما طيحش فيد المستثمرين ومالين لفلوس؟ ولا هاد غير دايرينها سبا باش يوصلو لشي امتياز ولاشي اتفاق مع الفيفا يرضيهم؟

راه اللي متبع تطور الاحداث مؤخرا بين الاتحاد الدولي لكرة الكرة القدم والاتحاد الأوروبي للعبة، وتعنت الأخير ومواصلة معارضتو لاي قرار من الفيفا، وفهاد الوقت اللي فيه صراع بين المغرب وإسبانيا على تنظيم فينال مونديال 2030، غادي يربط الملفين ببعضياتهم، وغادي يطرح سؤال كبير “واش الاتحاد الاوروبي لكرة القدم كايبتز الاتحاد الدولي لكرة القدم والرئيس ديالو جياني انفانتينو باش يعطي فينال مونديال 2030 للصبليون؟”

راه تقدر تختلف مع التسيير ديال جياني انفانتينو فالفيفا حتى تعيا وانه براگماتي وكايقلب على مصلحتو… ولكن ما يمكنش ما تعترفش له بأنه عطى فرصة لدول كثيرة اللي كانت محگورة فالكورة انها تبان فالواجهة واخا غير مرة مرة، وولات كاتسمع صوتها وسط دول اللي كانت بوحدها محتكرة الفوتبال، واللي أغلبها من اوروبا وتحت لواء الاتحاد الاوروبي، والدليل هو انه رفع عدد المنتخبات فمونديال 2026 لـ48 منتخب وهذا العدد يقدر يتزاد فمونديال 2030، وخلى انفانتينو الفيفا تنفتح اكثر على مناطق اخرى فالعالم بحال افريقيا واسيا والقارتين الأمريكيتين، وما تبقاش الكورة محتكرة غير من الأوروبيين اللي سيطرو عليها حتى لعهد الرئيس السابق للفيفا جوزيف بلاتر، وهذا هو السر ورا حصول انفانتينو فهاد الأزمة اللي كايدوز منها على دعم الاتحاد الافريقي لكرة القدم كامل ودول اخرى بحال الأرجنتين والمكسيك، وهذا الشي من غير الفلوس اللي قدر يدخل للفيفا من عائدات المسابقات، واللي خلات الاتحاد الدولي اكثر تحررا من تدخلات الأوروبين اللي كانو لعقود متحكمين فيه.

راه ما يمكنش الاتحاد الأوروبي لكرة القدم، يبقى يعبر على معارضة جياني انفانتينو والفيفا ويأكد الاستمرار فمقاطعة كاس العالم وهذا الشي قبل انتخابات رئاسة الفيفا فمارس 2027، بلاما يراعي مصالح إسبانيا والبرتغالي اللي منظمين مونديال 2030 بشكل مشترك مع المغرب، هذا الشي إلى ما كانش الاتحاد الأوروبي كايضغط بهذا الطريقة اللي كايدير على الفيفا وجياني انفانتينو باش يعطي لإسبانيا فينال مونديال 2030.

دابا شنو اللي مخلي الصبليون اللي يالاه رابحين كاس العالم 2026 وسلمهم اللقب انفانتينو وترامب، (شنو مخليهم) هما والبرتغال ساكتين بدون التعبير على موقفهم من ازمة الفيفا والاتحاد الأوروبي اللي منتمين له ولو غير ببلاغ يقولو فيه انهم كايتابعو هذه التطورات بين الجهاز الدولي والقاري بقلق، فالوقت اللي المغرب عبر على الموقف ديالو بوضوح من خلال دعم انفانتينو قبل ما يخرج الاتحاد الافريقي يعبر على الموقف ديالو، راه هذا الشي عندو تفسير واحد هو ان الاتحاد الاوروبي كايبتز انفانتينو والفيفا باش يعطيو فينال مونديال 2030 لمدريد.