الرئيسية > آش واقع > واش افتتاح قنصلية الامارات فالعيون لاربعا الجاية عندها علاقة بتطبيع الرباط مع تل ابيب؟ مسؤول لـ”كود”: ابدا وهاد الشي جا بعد مسار طويل بين الدولتين والمغرب ما يمكنش يقبل الوساطة فملفات حساسة بحال هادي راه هو رعى مفاوضات السلام بين مصر واسرائيل
31/10/2020 10:30 آش واقع

واش افتتاح قنصلية الامارات فالعيون لاربعا الجاية عندها علاقة بتطبيع الرباط مع تل ابيب؟ مسؤول لـ”كود”: ابدا وهاد الشي جا بعد مسار طويل بين الدولتين والمغرب ما يمكنش يقبل الوساطة فملفات حساسة بحال هادي راه هو رعى مفاوضات السلام بين مصر واسرائيل

واش افتتاح قنصلية الامارات فالعيون لاربعا الجاية عندها علاقة بتطبيع الرباط مع تل ابيب؟ مسؤول لـ”كود”: ابدا وهاد الشي جا بعد مسار طويل بين الدولتين والمغرب ما يمكنش يقبل الوساطة فملفات حساسة بحال هادي راه هو رعى مفاوضات السلام بين مصر واسرائيل

كود علي الصافي العيون ///

من نهار اتصل محمد السادس بمحمد بن زايد رجل الامارات القوي وتم الاعلان عن قرار افتتاح ابو ظبي لقنصليتها فالعيون وخبار بدات ك”توقع”٬ قبل ما يقدموها شي وحدين على انها خبار حقيقية٬ هاد لخبار هي ان هاد الافتتاح هي جزء من صفقة التطبيع بين المغرب واسرائيل. فهاد اللي كيروج ان الامارات ما هي الا ورقة لدفع الرباط للتطبيع مع اسرائيل. باش يعطيو لترويج هاد الشي غطاء شاد فراسو كيقولو: شوفو اش دارت السودان اللي قررات تطبع مع اسرائيل بتدخل الامارات.

وفق مسؤول مغربي ل”كود” فان هاد الربط ماشي بريء وغير حقيقي ابدا. المصدر قال ل”كود” ان افتتاح سفارة المغرب في العيون جات بعد مسار طويل بين الدولتين وهاد الشي عندو علاقة بالعلاقات الثنائية فقط لا غير.

مصدر اخر استغرب فتصريحو ل”كود” ترويج هاد الشي. “هادو ما كيعرفوش لا المغرب ولا تاريخو. الرباط يستحيل تخلي شي طرف خارجي ايلى بغات دير سفارتها فالدولة العبرية. اولا راه مسؤول فالخارجية الاسرائيلية قال ل”كود” قبل اسابيع بللي فكل عائلة اسرائيلية كاين فرد من اصل مغربي. راه اكثر من مليون اسرائيلي تزاد فالمغرب. واش واعيين بهاد الارقام؟

المصدر ذكر بما كان فالسابق “راه الحسن الثاني كان لاعب فالسياسة الداخلية الاسرائيلية. ما يمكنش يجي اليوم شي حد يقول لي راه غادية تكون وساطة. ثم حتى المفاوضات المصرية الاسرائيلية باعتراف رجالات الموساد كلها دارت فالمغرب برعاية الحسن الثاني قبل ما يوقعو كلشي فكامب ديفيد. ورئيس وزراء اسرائيل حينها بيگين ورئيس مصر السادات٬ باش سالاو وراجعين لبلادهم٬ دازو عند الحسن الثاني وشكروه. ثم زار شمعون بيريز كان وزير اول المغرب فايفران وتلاقى الحسن الثاني وفعهد الملك الحالي كان مكتب اتصال مغربي فتلابيب ومكتب اسرائيلي فالرباط. راه التاريخ هادا. باراكا من التخربيق”.

المصدر اكد ل”كود” ان حتى امريكا ما يمكنش دير وساطة بين الرباط وتل ابيب. تقدر تكون فاجتماع ثلاثي كيف وقع فنيويورك السيمانا اللي فاتت ولكن غير تحضر. يستحيل ترعى شي مفاوضات. شوفو اش وقع لرئيس ديبلوماسيتها بومبيو باش بغى يلقى الملك باش يقتارح عليه يستقبل بنيامين نتانياهو رئيس الحكومة الاسرائيلي. الملك ما شافوش. الرسالة واضحة: المغرب يستحيل يقبل وساطة او يقبل تدخل فعلاقة محتملة مع اسرائيل اللي فحكومتها الحالية عدد كبير من وزراء من اصول مغربية يوضح مصدر “كود”.

نفس المصدر ختم ل”كود” قائلا: “المغرب ايلى كان باغي شي دعم فالصحرا خاصو يكون من امريكا. اعتراف اميريكي بالسيادة المغربية =هاد الشي تقريبا مستحيل= مقابل تطبيع المملكة مع الدولة العبيرة. حتى هادي تفاداها”

موضوعات أخرى

02/12/2020 17:50

رئيسة فرع المغرب ديال المنظمة الإفريقية لمحاربة السيدا : كيبقى أكبر مشكل قدامنا هو غياب تربية جنسية فالمدارس و وسط الأسر ببلادنا.. و فزمان “كورونا” الخدمة ديالنا صعابت بزاف

02/12/2020 16:00

ثمن الإرسال والشحن ديال الكوليات في المغرب غالي بزاف والخدمات عيانة وخاصك تسنى ساعة أو كثر باش تسيفط أو تشد وهادشي راه قمة التخلف في زمن البيع والشرا في الأنترنيت وخدمات التوصيل خاص يدار شي حل ضروري

02/12/2020 15:50

ولد الرشيد لوزير الصحة: خاص سبيطار ميداني فالعيون باش نطوقو كورونا.. وما يمكنش سبيطار ديال ثلاث جهات فيه 23 سرير لمرضى كوفيد