كود سبور//
اعترف عبد السلام بلقشور بفشل الديربي جماهيريا السبت اللي فات برسم الدورة 26 من البطولة الاحترافية لكرة القدم، بسبب مقاطعة جمهوري الرجا والوداد، واعتبر أن الجمهور عندو الحق فمجموعة من المبررات اللي قاطع بها الماتش، وخصهم يسمعو له.
وقال عبد السلام بلقشور خلال المرور ديالو على قناة الرياضية: “كنت كانتمنى الفصائل المشجعة للوداد والرجا يكونو حاضرين فالتيران ويتحفونا بهاديك الصور الجميلة اللي كانو ديما كايعطيوها لنا فالديربي وللأسف ما حضروش وأنا كانحتارم القرار والموقف ديالهم، واحترم موقفهم والأكثر من ذلك بعض المبررات ديالهم على مقاطعة الديربي هي مبررات موضوعية، وكانشوف بعضها شخصيا موضوعية وخاصها تعالج فالوقت القريب جدا، إلى كنا فطاولة حوار أو مناقشة خاصنا نعالجو هذه الإشكالات اللي مطروحة، والإخوان عبرو على موقفهم وسجلو موقف، وهذا ماشي عيب حيث حنا فبلد ديمقراطي نؤمن بالحريات الفردية والجماعية”.
وكمل رئيس العصبة الوطنية لكرة القدم الاحترافية، وقال: “الجمهور لاحظ أنه كاينين أشياء خاصنا نستاجبو لها كمسؤولين ويمكن أننا نگلسو، واللي هي موضوعية وقابلة للتنفيذ سنشرع في تنفيذها وفي أسرع وقت واللي هي خاصها نقاش وتعميق نقاش او دراسة معمقة غانمشيو فهذا الاتجاه بلا عقد وبلا تشنج بلا غالب ولا مغلوب فهاد العملية، وهادو ولادنا ومنا والينا والجمهور هو ملح كرة القدم وقلبها النابض، وأساس الإشهار والدعاية والموارد المالية وأساس كلشي ويجب الإنصات بمسؤولية وجدية لصوت الجماهير ولكن مع احترام القوانين المعمول بها فالمجال التشريعي الوطني والدولي”.