عادل المكناسي الرباط ////
عزيز اخنوش رئيس التجمع الوطني للاحرار يتعرض لقصف مكثف منذ بيان الاحزاب الاربعة البارح =التجمع الوطني للاحرار والاتحاد الدستوري والاتحاد الاشتراكي والحركة الشعبية =.
هو فالواجهة ونساو ادريس لشكر ومحاند العنصر ومحمد ساجيد. هادو اللي كلا لعصا. كلا لعصا حقاش كثار ما قدروش تكون عندهم الجرأة وينتاقدو اللي جابوه. اللي ورطوه. السيد عندو بيزنس ديالو فحكومة بنكيران ما كانتش عندو رغبة يدير ولاية ثانية بعد ولايته مع حكومة عباس الفاسي. بنكيران اول واحد قلب عليه ورغبوه يكون.
علاقتو مزيانة مع الاحزاب السياسية كلها. عندو مسافة مع رجالات قويين فالدولة. ما تابع لا لهادا لا لداك. يمكن هاد الحياد ديالو فمحيط فيه حروب كبيرة ديال المواقع كتفسر جزء مما تعرض له في الاونة الاخيرة وبعد البيان الرباعي.
راه ماشي بنكيران ولا حزبو اللي ضد اخنوش. راه اللي كيحاربو من التحت هو اللي كيحسو باللي غادي ياخد ليهم بلاصتهم.
حتى السياسة الحزبية كان اعلن انو بعد منها وبغى غير يكمل مهامو فوزارة الفلاحة والصيد البحري. جا فوضع صعيب بزاف كيعيشو حزبو واخا هاكاك دار بلاصتو. تقاتل. اليوم كيفما كان تقييمنا ليه راه فظرف قياسي ولينا كنسمعو غير “اخنوش: بنكيران”. واحد كيقود حزب يالله عندو 37 فمواجهة زعيم حزب عندو 125. هادا فحد ذاتو انتصار. لاعب لعب مزيان. فيه اخطاء بحال التوقيع على البيان الرباعي. غير كل واحد وكيف غادي يدير التقييم.
باش يجي واحد ويجر معاه حزب كامل ماشي غير الاتحاد الدستوري كنتكلم على الاتحاد الاشتراكي خاصك تكون سيدي ومولاي.
هادي حادثة سير اكيد ان علاقتو المزيانة ببنكيران رغم كل ما حدث بينهما غادي يخليهم بجوج يتجاوزو هاد البلوكاج اللي وصل لازمة.
