كود سبور//

خرجت واحد التصويرة كاتبين ان أكاديمية الرجاء الرياضي اللي كاينة فمنطقة بوسكورة نواحي الدار البيضاء، كايخونو الما من الزنقة، بواحد التيو دايرينو فرشاشة ديال الما اللي كاتكون فالشوارع بحال الرشاشة اللي كايخدمو بها البومبيا إلى كان شاعل شي حريق باش يطفيوه.

وتواصل جورنال “گود” مع حسن السنيني المسؤول داخل أكاديمية الرجاء الرياضي، وكذّب كل ما يروج بخصوص واحد الصورة كاتبين أن لاكاديمي ديال النادي كايخونو الما بتيو من رشاشة الما اللي كاتكون فالشوارع، وكاينة قدام مقر الأكاديمية، وقال فتصريح له: “هذا الشي ما عندو علاقة بالأكاديمية ديال الرجا، والتيو مديرو لسقي الجرادي، واللي بغى يتأكد يجي لعين المكان ويشوف براسو”.

مصدر آخر فالرجاء الرياضي، كشف لـ “گود”، أن أكاديمية النادي تتوفر على 2 بيار كانو تحفرو بجوج فعده الرئيس الأسبق محمد بودريقة وتجهزو، وهما اللي موفرين الما اللي كاتخدم به الأكاديمية دابا، واكد نفس المصدر الرجاوي أن التكلفة المالية ديال استهلاك الما نقصت بزاف فلاكاديمي ملي تحفرو هاد جوج بيار حيث كان الما كايجي غالي.