كود -أصيلة //

تعرّضات منحوتة فحديقة مكتبة الأمير بندر بن سلطان بن عبد العزيز فأصيلة مؤخراً للتخريب، ومازال ما معروفش شكون اللي واقف ورا هاد الفعلة.

هاد المنحوتة دارها الفنان البحريني خليل الهاشمي فصيف 2014، بمناسبة الدورة 36 من موسم أصيلة الثقافي الدولي، وهاد الشي جا فإطار الاحتفال بالبحرين كضيف شرف،وهاد التخريب جا غير من بعد أسابيع قليلة على سْرقة الصفايح دالنحاس من قبة برج القمرة البرتغالي التاريخي.

سكان المدينة ولاو كيسولو على شكون المسؤول على هاد التصرف الهمجي؟ واش شي عمل مقصود ولا تبرهيش الدراري ؟ خصوصاً أن المسؤولين على المكتبة سبق ليهم تدخلو مؤخراً باش يمنعو شباب كانو كيلعبو الكرة وسط الجردة فين كرفصو الگازو.

واللي كيقلق أكتر هو أن هاد المنحوتة قريبة بزاف لمقر الباشوية ديال المدينة ،هادشي لي واقع فـأصيلة كيطرح بزاف ديال التساؤلات على المصير ديال العشرات من المنحوتات والأعمال الفنية، خصوصاً الجداريات، حيث ولات هاد التجربة الفنية، اللي عندها نص قرن فالمدينة معرضة للدمار، ولي زاد الملحة على الجرح هو ان فنان فرنسي رسم جداريات مؤخراً بلا ترخيص، بحالا المدينة سايبة.

الناس ديال أصيلة عيّاو من بحال هاد التصرفات اللي مكتعجبش، ولي كترات خصوصا من بعد موت العمدة محمد بن عيسى ،فين ولات عمليات تخريبية كتعاود، سوا سرقة معالم تاريخية او تخسار الجرادي والجداريات، الشي لي كيخلّي سؤال كبير كيتطرح ،شكون غادي يحمي الذاكرة ديال أصيلة؟ وشكون غادي يحضي الطابع الفني ديالها .

الحفاظ على أصيلة مسؤولية جماعية خاصها ردات البال من المؤسسات ووعي من المجتمع، قبل ما تولي هاد السلوكات هي لي شايعة.