كود سبور//

رجع تاني اسم المدرب التونسي فوزي البنزرتي، يرتبط بالوداد الرياضي، اللي مقبل على المشاركة فكأس العالم للأندية، ولكن كايعيش أزمة تسييرية وتقنية حقيقية بسبب التسيير الكارثي ديال هشام آيت منا فأول موسم له على راس النادي.

وتوجه سؤال لفوزي البنزرتي بعد نهاية ماتش الفريق ديالو الاتحاد المنستيري التونسي فبطولة تونس، من راديو “موزاييك” وقالو له “واش نقدرو نشوفوك فكأس العالم لأندية؟” وجاوب شيخ المدربين وهو مبتسم وتايق فراسو، وقال: “ممكن”.

هذا الجواب ديال فوزي البنزرتي كايخلي الاسم ديالو تاني يرجع يرتبط بالوداد الرياضي، اللي عاطيين المدرب موكوينا عطلة وهو خرج برا المغرب ومازال ما تفاقو معه، ودارو أمين بنهاشم مدرب مساعد وكلفوه بتدريب الفريق 3 الماتشات فالبطولة حتى يسالي الموسم، وسط انتقادات كبيرة للرئيس هشام آيت منا على هاد طريقة التسيير الارتجالية خصوصا وأن التسيير ديالو الكارثي تسبب هذا الموسم فخروج الفريق بزيرو لقب.