گود سبور//

لاقيين عدد كبير من الوداديين مشكل باش يتصورو مع طروفي كاس العالم للأندية 2025، اللي استقبلوه الوداد الرياضي بالمغرب البارح الثلاثاء واليوم الاربعاء، استعدادا للمشاركة فالبطولة اللي غاتكون فالمريكان الصيف الجاي.

وإعلان إدارة الوداد الرياضي برئاسة هشام ايت منا على شكون الوداديين اللي اختارت باش يتصورو مع الطروفي ديال كاس العالم، وحصرهم فالمنخرطين وأصحاب بطائق الاشتراك والمنتمين لگروب “وينرز” خلف تدمر وسط عدد كبير من الوداديين اللي ما عاجبهومش الحال، واعتبرو أن قرار إدارة ايت منا عشوائي وفيه واحد التمييز بين الوداديين، وحرمان بزاف منهم من حقهم فأنهم يتصورو مع طروفي كاس العالم للأندية، اللي جميع الوداديين ساهمو فتأهل الفريق للمشاركة فيها.

وكاين من الوداديين اللي مشى بعيد وكايشوف أن هذا القرار من إدارة ايت منا هو مقصود باش يقسم الوداديين بين “وينرز” والوداديين اللي ما عندهمش انتماء للگروب، ومحاولة فاشلة لاستمالة وكسب رضا الگروب الودادي اللي تفرگعو عليه بسبب الوضع الكارثي اللي وصل له الفريق، خصوصا وأن عدد كبير من الوداديين فقدو فيه الثقة وطالبوه يمشي بحالو، مع العلم أن ايت منا عمرو ما كان ودادي وحتى كاس العالم للأندية اللي گالس يتصور معاه وراكب على الموجة، راه ملي داه الفريق فعهد الرئيس الأسبق سعيد الناصيري، كان ايت منا مازال رئيس لشباب المحمدية، ومرة مرة كايجي لستاد دونور ويقول شي كلمة على الرجاويين باش يكسب عطف الوداديين، ولكن هذا الشي اللي كيدير بالتفرقة بين “وينرز” وباقي الوداديين ما غايقولبش به “وينرز” اللي ماشي أغبياء أو دراري صغار كيفما كايتصور، حيث عايقين به، والملثمين (وينرز) همهم الوداد وماشي الأشخاص والمصالح الشخصية والتصاور.