كود وجدة//

طيلة هاد الأسبوع، ومع تصاعد الاحتجاجات والوقفات اللي شارك فيها بعض أفراد جيل “Z”، اللي تخللاتها فبعض المرات أعمال شغب وتخريب وسرقة محلات تجارية، تفاجأ عدد من سكان مدينة وجدة بانتشار كتابات حائطية مسيئة كتشتم رموز الدولة وعناصر الأمن، بعبارات من قبيل:
“كاع البوليس ولاد القاف”

هاد الكتابات ما كانتش فمكان واحد، بل تفرقات على جدران مؤسسات تعليمية وصحية فمناطق مختلفة، بحال مدارس المكي الناصري، عبد الرحمان حجيرة، ابن خلدون، وحتى مستوصف القرب بحي الوحدة.

وحسب معطيات توصلات بيها (كود) الفرقة المتنقلة للدراجيين بولاية أمن وجدة دخلات على الخط، وبدات عملية بحث دقيقة بتنسيق مع القيادة الأمنية، وجمعت فيديوهات وصور من كاميرات المراقبة كتوثق لحظات قيام المشتبه به بالكتابة على الجدران. ومن بعد تحليل الأدلة ووسائل الإثبات، تمكنو يحددو هوية الفاعل.

وبعد تحريات مكثفة دامت أيام، الأمن استاطع يشد المشتبه فيه اللي اعترف.. الشاب كيستعمل دراجة نارية صينية زرقاء من نوع “دوكر”، وكان كيستعمل بخاخات صباغة سوداء فالعمليات ديالو.

وبعد ما واجهوه بالأدلة، اعترف المعني بالأمر بالمنسوب ليه، وتسلماتو الفرقة الولائية للشرطة القضائية بوجدة باش يكملو المساطر القانونية المعمول بها.

وبهاد الشكل، تكون مصالح الأمن بوجدة نجحات فـ فكّ لغز الكتابات الجدارية المسيئة اللي خلقات استياء واسع وسط الساكنة، وأكدات مرة أخرى على جاهزية الأجهزة الأمنية فالتعامل السريع مع أي محاولة للمس برموز الدولة أو إشعال الفتنة.