كود – وكالات //

محكمة الاستئناف ففرنسا حكمات اليوم السبت 26 شتنبر 2026 على الفنان المغربي سعد لمجرد بـ10 سنين ديال الحبس، فالقضية اللي كتجمعو بلورا بريول، من بعد الاستئناف ديال الحكم الابتدائي اللي كان صدر فحقو من قبل.

لمجرد كان استأنف الحكم اللي صدر فشهر ماي الماضي، واللي كان عطاه الحبس 5 سنين بتهمة الاغتصاب ديال شابة لي كان تلاقا بها ف 2018 فسان تروبيه جنوب شرق فرنسا، حسب ما كان علن المحامي ديالو كريستيان سان باليه يوم 20 ماي 2026.

وكانت محكمة فمدينة دراغينيان، جنوب شرق فرنسا، دانت المغني المغربي اللي عندو 41 عام نهار 15 ماي 2026، وحكمات عليه بـ5 سنين ديال الحبس بتهمة الاغتصاب، من بعد محاكمة دامت 4 أيام.

ولمجرد وقف قدام المحكمة وهو فحالة سراح، فجلسة كانت مغلقة بطلب من المدعية، والمحكمة ما كانتش خرجات فحقو مذكرة اعتقال.

النيابة العامة كانت طالبة الحكم عليه بـ10 سنين ديال الحبس، فحين الدفاع ديالو طالب بتبرئتو، خصوصا أن الفنان المغربي بقى كينفي التهمة الموجهة ليه، وكيأكد أن العلاقة كانت برضا الطرفين.

وكترجع وقائع القضية ل 2018، ملي كانت المدعية كانت سربابط وتلاقات بلمجرد فواحد البواط. وكتقول إنها وافقات تمشي معاه للفندق اللي كان فيه باش يشربو شي كأس، قبل ما المجرد اغتصبها حسب لي كتقول.