كود: السوالم//

هاد الشاب بلال موضوع الاعتقال اللي نفذاتو لابيجي ديال الجدارمية ما عندو علاقة بالشاب بلال مغني الراي الجزائري، هاد الشاب بلال هو آلة البطش ديال عصابة ولاد الفاطمي اللي مروعة الكبير والصغير في حد السوالم، خاصة السوالم الطريفية، وبالضبط دوار الخلايف اللي رداتو هاد العصابة كولومبيا مصغرة ديال ترويج مختلف أنواع المخدرات، من حشيش وبوفا وخمور وكيف، وحتى الكوكايين كا يتباع عند ولاد الفاطمي.

لابيجي ديال الدرك الملكي طارت اليوم الأحد 18 غشت على هاد الشاب بلال، اللي معروف بعدوانيتو وإجرامو اللي ما كا يتحدش.
وحسب مصادر كود لابيجي جات مع 6 صباح لهاد بلال واعتقلاتو، وهو مازال في الفراش، لأنهو كون لقاوه فايق غادي يكون خطر.

وقالت مصادر (كود) أن هاد الشاب بلال اللي مخدماه عصابة ولاد الفاطمي، شارك نهاية الأسبوع الماضي في الاعتداء الدامي اللي نفذاتو العصابة واللي مشى ضحية ديالو جوج ديال الشبان كانوا راكبين على دراجة نارية.

وزادت مصادر (كود) أن هاد بلال كان عندو دور مهم في هاد الاعتداء الخطير اللي وقع عند الكروازمة ديال ولد لحسن اللي واقعة بين طريق مولاي التهامي وطريق 23 باتجاه طريق آزمور.
وزيادة على الجرائم الكثيرة مازال السيارة التوارݣ اللي تنفذات بيها الجريمة حدا فران الخلايف، حيث عصابة ولاد الفاطمي جابو ديبناج في الليل وهزوها من مسرح الجريمة وخفاوها.

لكن (كود) جابت الصورة الحصرية ديالها، حدا السكن العشوائي اللي كارياه عصابة ولاد الفاطمي للخدامة ديالها اللي كيوزعو المخدرات وكا يتسخرو في توصيل الطلبيات، لأن عصابة ولاد الفاطمي ولات باطرونة فيها الأب والأم وجوج ديال الخوت وبنت، وجوج آخرين كاينين في الحبس، حسب ما أفادت مصادر من السكان.

وللإشارة أملاك هذه العصابة اللي جاية من تجارة المخدرات في أسماء الأب والأم ديال هاد خمسة الخوت.