كود الرباط//

واخا كاين نظام الدعم الاجتماعي المباشر، الحكومة باقا محافظة على دعم المواد الأساسية، اللي كتهم القدرة الشرائية ديال المغاربة، خصوصا فظروف دولية مزال كتتميز بتقلب الأسعار.

وحسب تقرير المقاصة المرفق بمشروع قانون مالية 2026، الدولة قررات تستمر فدعم أسعار غاز البوتان، السكر، والدقيق الوطني من القمح اللين، وخصصات لذلك غلاف مالي كيتجاوز 13,7 مليار درهم خلال السنة الجاية.

التقرير كايأكد أن الهدف من الاستمرار فهاد الدعم هو “ضمان تموين منتظم للسوق الوطنية بالمواد الأساسية” و“الحفاظ على استقرار الأسعار الداخلية”، خصوصاً بعد عام صعيب عرف تراجع الإنتاج الوطني من القمح والسكر بسبب الجفاف.

وحسب التقرير، من يناير حتى لغشت 2025، كلفة دعم البوطا وصلات تقريباً 8,5 مليار درهم، بانخفاض بـ17 فالمية مقارنة مع 2024.

أما السكر فكلف الدولة 3,4 مليار درهم، ناقص بـ23 فالمية، فيما دعم القمح والدقيق تراجع حتى هو بـ29 فالمية واستقر فـ1,1 مليار درهم.

لكن، فالمقابل، التقرير كيشير بوضوح أن الدولة غادية فـ”الطريق نحو إصلاح شامل لنظام المقاصة”، بمعنى الانتقال تدريجيا من الدعم الشامل إلى الدعم الموجه مباشرة للأسر المحتاجة، فإطار توسيع نظام الدعم الاجتماعي المباشر اللي بدا الخدمة ديالو من 2023.

بمعنى آخر، فـ2026 الدعم باق، ولكن المقاصة غادية تتبدل. الدولة غاديا دير توازن بين استقرار الأسعار وعدالة الاستهداف. واللي واضح أن مرحلة “البوطا للجميع” غادي تولي تدريجيا “البوطا للمستحقين فقط” ولكن ماشي دبا. ممكن سنوات مقبلة.