الرئيسية > آراء > واخا كايظلو ينگرو على المحتوى الهزيل ! الارقام كاتقول انه المغاربة كايموتو على المحتوى ديال التبرگيگ و الفضول و وصفات التبيض و قناة لالة زعطوطة
11/03/2019 11:30 آراء

واخا كايظلو ينگرو على المحتوى الهزيل ! الارقام كاتقول انه المغاربة كايموتو على المحتوى ديال التبرگيگ و الفضول و وصفات التبيض و قناة لالة زعطوطة

واخا كايظلو ينگرو على المحتوى الهزيل ! الارقام كاتقول انه المغاربة كايموتو على المحتوى ديال التبرگيگ و الفضول و وصفات التبيض و قناة لالة زعطوطة

سهام البارودي – كود//

واخا الناس ديال الفايسبوك كايضلو يسبو فالمحتوى ديال اليوتوب المغربي، و كايقولو عليه محتوى هزيل ! و كايضلو يسبو فالقنوات المغربية و كايعتابرو البرامج ديالها عيانة و كاتكلخ عباد الله … راه كايبقى المحتوى سواءا فيوتوب و لا فالقنوات المغربية كايعبر بشكل مباشر على شنو بغاو المغاربة يشوفو !
ماشي المغاربة ديال فايسبوك و تويتر ! لا المغاربة لي كايشكلو الأغلبية ! دوك عشرة مليون مغربي لي كايتفرجو كل نهار فحلقة سامحيني !

المغاربة عزيزة عليهم قناة مربوحة و شاهد لالة حادة كلات كيلو د الشوا فالسوق ! و عزيزين عليهم فيديوات اسماء بيوتي كاتوري طواليطها لعباد الله و كاتهضر على قصة جواجها هي و احمد ! و فيديوات سميمو بنبشير كايتعاطا مع ” عاهرات الانستغرام ” …و الفضائح و التبرگيگ و ما‌تسميه الانتلجينسيا المغربية ” التفاهة” !

التفاهة عزيزة على المغاربة و كايموتو عليها و  كايشجعو المحتوى ديالها فالفايسبوك و اليوتوب و حتى فالقنوات العمومية ! علاش ؟ حيت توسامبلومو الناس ماعندهاش شي مستوى معرفي كبير لي غايخليهم يتاجهو لشي حاجة اخرى ! ماعندهمش اللغات ! ماعندهمش الفهم الكافي ! ماعندهمش المستوى الثقافي ! و ملخر ! مافيهم مايصدعو راسهم و يتفرجو فشي حاجة اخرى.

من العادي جدا ! انه فبلاد فحال المغرب المحتوى يكون بهاد الهزالة ! حيت بنادم براسو هزيل ! آش غاينتج ليك ؟ دوليبران؟ طبعا غاينتج ليك الهزالة.

لي ماشي عادي هوا انه نفس الناس لي كاينگرو على التفاهة يكونو كايستهلكوها !و لي ماشي عادي اكثر انه هادوك لي كاينگرو على التفاهة مايحاولوش يديرو شي حاجة من غير النگير باش يغيرو شوية و يحاربو ” التفاهة” !

كانظن انه اليوتوب اليوم متصالح مع المغاربة ! ماشي كلهم اكيد و لكن اغلبهم ! و كايلبي ليهم الحاجيات ديالهم ( الفضول، التبرگيگ، التكوميك، وصفات السمنة و التبييض …) هادشي لي بغاو عباد الله و لي جاو شي عباد الله اخرين كايصايبوه ليهم و يحطوه ليهم فيوتوب.

نهار يكون تغيير على مستوى الاسرة
و التربية
و المدرسة

ديك الساعة و بشكل طبيعي غادي يتغير المحتوى.

موضوعات أخرى

22/03/2019 15:47

العز ليك. فضيحة توظيف محمد بن سلمان للفنانين لمغاربة باش يقادو صورتو لمقودة. الفنان المشهور الشوبي ل”كود”: مبادئي تمنعني من العمل مع ال سعود