كود الرباط//
علمت “گود” من مصدر قيادي في حزب الحركة الشعبية، أن المكتب السياسي للحزب قرر يدعم ترشيح الوجه الصحراوي يحفضو بنمبارك من الداخلة لي كان تعطا ليه وعد ف 2021 بلي نوبتو غا تجي ف 2024، باش يكون الخليفة الرابع لرئيس مجلس المستشارين.
وحسب مصدر “گود” فإن هاد القرار تخاذ وذلك مور الخطاب الملكي ديال البارح لي هضر فيه على قضية الصحراء والدور الكبير لأبناء الصحراء في الدفاع عن الوحدة الترابية.
يشار بلي بحال جميع الفرق البرلمانية فالغرفة الثانية، كاين صراع على المناصب فأجهزة وهياكل المجلس بين مرشحين كيحاولو يضمنو ليهم بلاصة خلال محطة تجديد هاد الهياكل.
بين الفرق لي شاعلة فيها القضية مزيان، فريق الحركة الشعبية لي كيتصارعو فيه أربعة مرشحين عن منصب الخليفة الرابع لرئيس المجلس: المهدي عثمون لي كان دوز النصف الأول وباغي مازال يزيد، يحفضو بنمبارك المرشح الصحراوي من الداخلة لي كان تعطا ليه وعد ف 2021 بلي نوبتو غا تجي ف 2024، ونبيل اليزيدي لي خدام مزيان فالمجلس، والأخير عبد الرحمان الإدريسي لي ترأس لجنة التعليم في النصف الأول.
الحركة الشعبية وفق مصدر قيادي اختارت وجه صحراوي يكون بلاصت المهدي عثموني لي عندو ملف خانز فالقضاء بحيث سبق في شتنبر 2023 أن قضت غرفة الجنايات الابتدائية المكلفة بالجرائم المالية لدى محكمة الاستئناف بالدار البيضاء بإدانته بثلاث سنوات حبسا نافذا، في ملف متابع فيه رفقة تقننين ومقاولين وموظفين بجماعة خريبكة، بتهم تبديد واختلاس أموال عمومية.
