الرئيسية > آراء > واخا دازت ربعين عام! حتى حاجة ماتبدلات! مازال ف2022 أي مرا بغات دافع على حقوق النساء فالمغرب فحال لي دارت عائشة الشنّا غاتعرض للعنف والسبّان وغاتسمى كاتشجع الفساد! حيت المجتمع ماكايقبلش بالعيالات الحارّات! القادّات! الناس بغات شي “أميرة زوجي” لي كاتعرف غا المرقة ووصفات تبييض المناطق الحساسة!
28/09/2022 17:00 آراء

واخا دازت ربعين عام! حتى حاجة ماتبدلات! مازال ف2022 أي مرا بغات دافع على حقوق النساء فالمغرب فحال لي دارت عائشة الشنّا غاتعرض للعنف والسبّان وغاتسمى كاتشجع الفساد! حيت المجتمع ماكايقبلش بالعيالات الحارّات! القادّات! الناس بغات شي “أميرة زوجي” لي كاتعرف غا المرقة ووصفات تبييض المناطق الحساسة!

واخا دازت ربعين عام! حتى حاجة ماتبدلات! مازال ف2022 أي مرا بغات دافع على حقوق النساء فالمغرب فحال لي دارت عائشة الشنّا غاتعرض للعنف والسبّان وغاتسمى كاتشجع الفساد! حيت المجتمع ماكايقبلش بالعيالات الحارّات! القادّات! الناس بغات شي “أميرة زوجي” لي كاتعرف غا المرقة ووصفات تبييض المناطق الحساسة!

سهام البارودي – كود//

الله يرحم عائشة الشنّا المرأة المناضلة لي وهبات وقتها و طاقتها لقضية الأمهات العازبات فالمغرب و لي الأغلبية الساحقة منهم كايجيو من اسر مقودة عليها و كايعيشو فظروف صعيبة بزاف لا هوما لا ولادهم ! امهات ضحايا الفقر و الجهل و انعدام التربية الجنسية …

عائشة الشنّا فاش بانت فالمغرب و بدات المعركة ديالها تعرضات لبزاف ديال المضايقات خصوصا من طرف اللحايا الظلاميين لي تاهموها بلي باغا تشجع الفساد ! حيت بغات تخلق فضاء لاستقبال و مساعدة الامهات العازبات راها كاتشجع الفساد ؟
الجواب ديال الخوانجي باين : اه كاتشجع الفساد ! حنا بغينا الامهات العازبات يبقاو مكرفصات للدين ديماهم ! بغيناهم يلوحو ولادهم فالطوارو د الزبل ! مابغيناش شي واحد يعتقهم و ينتشلهم من الميزيريا!

تّاهموما فشرفها ! ضحكو عليها ! حتى من العنف النفسي مارسوه عليها و فالكتاب ديالها راها عاودات كيفاش هجم عليها واحد بولحية واحد النهار و عايرها !

و للاسف ! بين نهار اسسات عائشة الشنا الجمعية ديالها و بين اليوم دازت اكثر من ثلاتين سنة ! و الحالة هي هي ! شوف الخوانجية ديال المغرب و السلفيين واش ترحمو عليها ؟ طبعا لا ! و دابا دابا نيت ! مازال اي مرا رفعات صوتها باش توصل مطالبها للناس و المجتمع كاتتاهم بأنها قحبة ! مازال لدابا المناضلات النسويات كايتعرضو للتنمر و السخرية و العنف النفسي و الجسدي و كايشوفوهم بزاف د الناس على اساس انهم باغين ينشرو الفساد و يضسرو العيالات على الرجال و ديك الهضرة الخانزة لي كاتخرج من بنادم خانز !

عاشت عائشة الشنّا و ماتت و مازال المرا فالمغرب غير مرغوب فيها فالفضاء العام ! مازال المرا فالمغرب كاتهاجم ا بغات تدافع على حقوق بنات جنسها ! مازال المرا فالمغرب ماعندهاش حق الاجهاض و مازال بزاف د الامهات العازبات كايتمرمدو و كل نهار كايلوحو ولادهم فالطوارّو د الزبل !

حيت واخا دازت اكثر من ثلاتين عام ! مازال العقلية هي هي ! عقلية ماكاتبغيش العيالات القادّات ! الحرّات ! لي كايهضرو و كايغوتو و كايخرجو عينيهم ! عقلية باغا غا ” حبيبة ابيها” و “ام احمد” و ” أميرة في بيت زوجي ” دوك موخنونات لي ماكايهضرو ماكايناقشو ماعندهم شخصية ماعندهم صوت كايعرفو غا ياكلو و يخراو كي البهايم !

موضوعات أخرى

04/12/2022 18:12

معهد الشرق الأوسط الأمريكي كيحذر من تداعيات التوتر المتزايد بين المغرب والجزائر واحتمال تطور الأمور  إلى مناوشات عسكرية

04/12/2022 17:20

وشوفو لي كنتساينوهم يكونو نموذج فاحترام القانون.. سيارة ديال البرلمان مركونة فوق الطروطوار وسادة الطريق كدام وزارة العدل (صورة)

04/12/2022 14:32

روح “العائلة” الودادية كتحلق بالأسود لصناعة التاريخ فمونديال قطر. بيها شفنا إنجاز 86 كيتعاود وسرها كلشي مقتنع غادي يمشي بعيد بمجموعة الركراكي فهاد الحدث العالمي