عفراء علوي محمدي- كود//

وخا كانت سحبات مديرية الأدوية والصيدلة، التابعة لوزارة الصحة، ليستات ديال الكشف السربع على فيروس كورونا المستجد عن طريق اللعاب، مازال هذ ليكيت كيتباعو “بطاطا برطل” ففيسبوك.

فالماركيت ديال موقع التواصل الاجتماعي، يكفي تقلب على اسم الكيت “Gigalab” باش تلقى منو العشرات معروضين للبيع، خصوصا فجهة كازا، والثمن ديالو كيتراوح بين 100 حتى ل200 درهم.

وكاينة شركة خرى حاطة إعلان البيع بالطايطاي، ومسبونسوريزاه من لفوق، باش يشوفوه أكبر شريحة ممكنة ديال الناس، وكتقول أنه كيمكن يتليفرا حتى للدار.

وكانت منعات مديرية الأدوية هذ الكيت بعدما تبين انه متخصص للاستخدام التشخيصي فالمختبر، وتعطى لموزعي الأدوية بالجملة بلا ترخيص من الوزارة.

ومنعات الوزارة هذ التيست، اللي سميتو “Gigalab Covid 19 Ag Gold Saliva”، حيت مامعروفش نسبة النجاعة والفعالية ديالو، كيف كيمكن لمستعمليه يكتفيو بيه، وواخا يخرج ليهم التيست إيجابي مايخبروش بهشذي السلطات وماياخدوش الدوا ويلتزمو الحجر كيفما خاص يدار.