كود – حد السوالم//

باش تعوض السلطات مقعد الرئيس المعزول لبلدية السوالم، اللي تحكم بعامين ديال الحبس في ملف (برلماني 17 مليار) دارت انتخابات جزئية نهار الخميس اللي فات في الدائرة ديالو.

وهي الدائرة رقم 13، وحسب ما توصلت به (كود) من معطيات فإن التنافس كان حاد بين المترشحين، خاصة ممثل حزب الميزان اللي تمكن من استعادة مقعده بهاد الدائرة اللي كان كيمثلها الرئيس المعزول «حكيم عفوت».

وتنافس مرشح حزب الاستقلال مع مرشح شاب وقوي وله تكوين محترم دخل للسباق باسم حزب الاتحاد الدستوري اللي الرمز ديالو هو الحصان.

وكانت النتائج النهائية لهاد الدائرة على الشكل التالي:
حزب الاستقلال : 149 صوت
حزب الاتحاد الدستوري : 138 صوت، يعني فاز رمز الميزان على رمز الحصان بفارق 11 صوت فقط.

فيما لم يتمكن مرشح حزب الاتحاد الاشتراكي من الحصول سوى على 55 صوتا، رغم أن 9 ديال المرشحين من حزب الاستقلال انقلبوا على الحزب ديالهم ومشاو صوتوا في الانتخابات ديال الرئاسة على مرشحة حزب الوردة اللي الحزب ديالها ما عندوش من غير جوج ديال المستشارين في مجلس جماعة السوالم، هما الرئيسة المنتخبة والأخ ديالها، ورغم هذا التكتل فإن حزب الوردة اللي كا يترأس جماعة السوالم حاليا خسر في هذا السباق الانتخابي.

ولأن حزب الاستقلال اعتبر أن المرشحين المنقلبين عليه اللي صوتوا ضد مرشحته للرئاسة (زهرة جاب رزق) أضاعوا عليه رئاسة الجماعة اللي صوتوا المواطنين فيها خلال انتخابات شتنبر 2021 بقوة على الميزان وعطاوه الأغلبية، قرر الحزب يرفع دعوى ضد هاد المستشارين، اللي تحكموا أخيرا بتجريدهم من العضوية من طرف المحكمة الإدارية بالدارالبيضاء، وفيهم نواب للرئيس، وأحدهم مدان بعقوبة حبسية نافذة في ملف برلماني 17 مليار.