كود سبور//

ودع منتخب غانا كأس العالم قطر 2022، من بعدما خسر فالجولة 3 من دور المجموعات مع الاوروكواي بنتيجة وتكرر عوتاني سيناريو الإقصاء ديالها مع سواريز وصحابو كيفما وقع فربع نهائي مونديال 2010.

وغرقت مرة أخرى غانا فاللعب الفردي وتضياع الفرص، وجاتها فرصة باش تماركي هي الأولى فالماتش ولكن الكابيتان ديالها أندري أيو ضيع بيلانتي وكرر داكشي اللي دار المواطن ديالو أسموا جيان مع نفس الخصم فربع نهائي مونديال 2010، نهار ضيع بيلانتي حتى هو ضد الاوروكواي كان المصير هو الإقصاء مع نفس الخصم.

الاوروكواي استغلو الفرصة ديال تضييع ضربة الجزاء من طرف غانا وماركاو عليها 2 بيوتا، ولكن حتى هما ما غاديش يكون عندهم الزهر هاد المرة حيث كوريا دارت المفاجأة وربحت البرتغال فالماتش الآخر اللي كان بادي فنفس التوقيت وعن نفس الجولة والمجموعة.

وبهاد النتائج تأهلت لثمن النهائي عن المجموعة 8، كل من البرتغال اللي تصدرتها برصيد 6 النقاط، كوريا الجنوبية اللي عندها 4 النقاط وتفوقت على الاوروكواي بالنسبة الخاصة حيث كوريا وتماركاو عليها هدف واحد والاوروكواي 2، أما غانا احتلت المركز الأخير برصيد 3 النقاط كانت خداتها ملي ربحت كوريا الجنوبية فالجولة الثانية.

للاشارة فتأهل المغرب والسنغال فقط من القارة الأفريقية لثمن نهائي كأس العالم قطر 2022، وتقصات تونس وغانا وحظوظ الكاميرون قليلة باش تكاليفا، مع العلم أن المستوى القوي فالدور الأول خلى الجماهير الإفريقية تحرر من العقد ديالها فكأس العالم وما تبقاش تجي تلعب فيه غير باش تشارك.