وكالات//

توفّى مصمّم الأزياء الإيرلندي-الأمريكي بول كوستيلو، اللي معروف عالمياً حيث كان هو اللي كيصمّم للأميرة الراحلة ديانا، عن عمر 80 عام، من بعد مرض ما طولش، كيف ما علنات عائلتو لوكالة فرانس برس. العائلة قالت بأن كوستيلو مات فـ لندن وكانت حداها مراتو وولادو السبعة.

تزّاد كوستيلو فـ دبلن سنة 1945، وبدا المسار المهني ديالو فـ باريس، ومن بعد مشى لميلانو وخدم مع ماركس آند سبنسر كمساعد مصمّم. وصل للقمة ديال المسار ديالو ملي تعيّن سنة 1983 كمنسّق شخصي ديال الأميرة ديانا، وبقى فهاد المنصب حتى توفات فـ 1997.

وكان كوستيلو كيعتبر داك الفترة من أهم اللحظات فحياتو المهنية، وكان فـ بزاف ديال الحوارات كيهضر على إنسانية الأميرة ديانا وبساطتها، وكان كيوصفها بأنها “كتوجد كاس ديال التي ممتاز ومعاه شي قطع ديال الكيكة”.

وكان معروف الأسلوب ديال كوستيلو بكونو كيجمع بين الرومانسية الكلاسيكية والستايل العصري، بألوان زاهية، ورود، وخياطة راقية. وتعتابر واحد من أبرز المصممين المؤثرين فـ عالم الموضة فإيرلندا وبريطانيا. وكان معروف حتى بالجدية ديالو والإصرار ديالو على الابتكار، حتى شبّهوه بعض الناس برياضي ما كيتعياش.