سهام البارودي كود//

هاد النقاش لاكانت عندو شي فائدة راه هي أنه عرّا على الحقيقة ديال بزاف ديال النصوصة د الرجال لي معولين على الدّين والقوانين الجائرة باش يغمقو على العيالات، هاد النقاش بيّن لينا بوضوح كيفاش بزاف ديال الرجال كايشوفو الزواج كمؤسسة ضغط، هوا كايشد المراة معاه ماشي حبَا فيه عارف مافيه مايتحب، هوا كايشد المراة بالحاجة ديالها ليه، عارفها غا صابرة معاه أما كون عندها البديل من غدا تهز جلابتها ومايعرفوها فين صدّات، داكشي علاش خايفين من قضية أنه عمل المراة المنزلي يتحسب كمساهمة منها فالثروة حيت هوا أصلا شادها من ديك الثروة (لي ما ثروة ما تاوزّة، بيت وكوزينة وگفة ديال الخضرة مخلطة) عارف راسو نهار تكون مستقلة ماديا عليه والله لا ضربات معاه الضربة.

راه هادشي علاش نايض أصلا الصداع من الأول وهادشي علاش كايحاربو عمل المرأة واستقلالية المرأة والتعديلات على النفقة وبيت الزوجية، هوما باغينها تبقى تحت السبّاط، باش تبقى ديما قابلة بداك المينيموم لي يقدر يعطيها الراجل، تاكل تايوكلها وتكسى تايكسيها وتسافر تايسفرها، ماكرهوش هوما نسدو على العيالات ونكتفوها ونجيبوها ليه تال بين يديه.

ماباغيهاش “ضسر” حيت عارف راسو لا زين لا جيب صحيح لا علاقات جنسية مگودة، لاش غاتبقى معاه هاد المراة؟ لاش غاتصبر ليه على الضسارة ديالو والقباحة ديال عائلتو؟ خاصو طبعا يضمن الطاعة والخضوع ديالها باش؟ بالحاجة ليه.

راه كلشي كايبدا وكايسالي فكيفاش الراجل كايشوف المراة، فأوروبا والدولة المتقدمة الراجل كايتربى على أساس أنه فحالو فحال المراة نفس الحقوق ونفس الواجبات داكشي علاش نهار كايحضر الفراق، وكاتبغي تمشي فحالاتها ماكايعتابرهاش كإهانة شخصية ليه، شرخ نرجسي، كايجلسو فوق الطبلة وكايشوفو شنو المشترك بيناتهم؟ شي كريدي كايصفيوه، شي ممتلكات كايقسموها، الدراري كايتحملو مسؤوليتهم بجوج ماديا ومعنويا والراجل كايعطي تاهوا من فلوسو ووقتو باش يربي ولادو واخا تفارق مع المراة. حنا عندنا لا، الراجل أصلا كايشوف المراة كشي كائن تابع ليه، ديالو، عبد ليه، فنهار هاد المراة كاتقرر تمشي وتخليه كايشكل ليه الأمر شرخ نرجسي، جرح، وايلي، كيفاش انا الراجل الواعر لي الدّين قاليا واعر والمجتمع قاليا واعر، كيفاش غاتجرأ وتخليني؟ كيفاش غاتمشي عليا؟ كيفاش غاتهرب عليا هاد المراة! هاد نص إنسان! ناقصة عقل ودين؟ وهنا كاتبدى الحرب والانتقام.