سامي العلوي -كود خريبكة //
تهزّات جماعة لفضالات التابعة لإقليم ابن سليمان، صباح اليوم الاثنين، على وقع جريمة قتل خطيرة مشات ضحيتها مرا ف الستينات من عمرها داخل دار العائلة.
وحسب مصدر من المنطقة، الزوج ديال الضحية، اللي عندو 68 عام وكيعاني من اضطرابات نفسية، دخل معاها فخلاف واعتدى عليها باستعمال بنسة، وضرَبها بهاد الأداة حتى طاحت وفارقت الحياة فالحين.
وفور توصلها بالخبر، انتقلات عناصر الدرك الملكي لعين المكان، ودارت المعاينة اللازمة فمسرح الجريمة، قبل ما يتم توقيف الزوج واقتيادو لمركز الدرك.
وجرى نقل جثة الهالكة لمستودع الأموات من أجل إخضاعها للتشريح الطبي لفائدة البحث القضائي، فيما تحط الزوج تحت تدابير الحراسة النظرية بتعليمات من النيابة العامة المختصة، فانتظار ما يتحال على القضاء من بعد ما يكملو التحقيق.
