محمد سقراط-كود///
واحد المثل شعبي دكالي كيقول “فاش كتزاد عندك بنت خرية وطليتيها على وجهك وفاش كتزوجها كتمسها من وجهك وتطليها في وجه راجلها”، يقدر يبان مثل متحامل على المرأة دابا ولكن في الواقع هاكا تم التعامل مع النسا في المغرب طيلة قرون، طبعا من غير بنات الأعيان والناس لي لاباس عليهم أما الطبقات الفقيرة تعاملوا مع البنت بحال شي مونتيف خاصو غير يتفك منو وكيزوجها لأول واحد يخطبها، وهادشي راه بقى حتى لهنا وهنا، راه غير حتى لتسعينات وباقي غير كيسمع الواخد فلان عندو بنات للزواج كيربط البغل مع الكرويلة ويمشي يخطب.
انا نيت كنت مشيت مع واحد عمي يخطب في الرحامنة، قصد واحد الناس دوارهم قريب لينا هدر مع بات البنت وماتفاهموش والنقاش مافاتش شي نص ساعة، عمي كان باغي البنت الصغيرة والأب باغي يزوج الكبيرة هي اللولة مابغاهاش تبقى ليه فراسو باغي يزوجهم حسب ترتيب الولادة، هاد النقاش راه تم حول حياة ومصير بنت وحياتها كاملة كيفاش غادي تعيشها، حيت الطلاق كان قليل بزاف داك الساعة، كانت المرة كيسلخها راجلها كتجمع حوايجها في رزمة تديرها فوق راسها وتجر ولادها الصغار وكتبانليك غادا وسط الحرنة على رجليها لدار باها كتدوز شي سيمانة، حتى كيهز الراجل شي خروف يديرو في الكرويلة ويمشي يذبحو في باب دار باها ويردها، وعاوتاني تغضب وتبقى تعاود هاد القضية حتى كيكبرو الدراري لي يحاميو على مهم والأب كيتغلب ويعيى ويولي حنين مقابل غير البگيرات والجامع وهاكا عاشو العيالات في البادية تمارة والتكرفيص والقهرة الحولي الصردي عندو الحقوق كثر منها.
ارتفاع معدلات الطلاق أنا كنشوفها حاجة مزيانة وكتعني أن المرأة على الأقل ولات عندها حماية نسبية بقوة القانون، وولات قادرة تطلق راسها وتبدى حياة جديدة بلا متحتاج زوج يصرف عليها ويسلخها؟ راه احسن حاجة في العلاقات كيف مكانوا هو الطلاق، انك تقدر تسالي علاقة في الوقت لي تحس أنك مابقيتيش مرتاح فيها، عوض تبقى حاصل فيها طول حياتك وتمرض وتصرف المرض ديالك في ولادك عبر السليخ والغوات والاحتقار والهدرة الخايبة والنكير، بينما شي وحدين كيخلعونا دابا بلي راه حقوق المرأة كتعني تفكك الأسرة والقضاء على سيطرة الرجل في البيت وغادي تنتج لينا أجيال ديال ولد مو، راهم أصلا منتوجين دابا الراجل كيضل يحوفر باش يصرف والمرة عي لي كتربي وفي نتيجة ولد مليكة ولد الضاوية ولد عيشة.
