كود -وكالات//

شدات البريطانية تيس كريستيان اهتمام الإعلام العالمي من بعد ما خرجات بقصة غريبة، السيدة قالت إنها ما كتبتاسمش وما كاتضحكش من نهار كانت مراهقة، يعني كثر من 40 عام، وهادشي كامل باش تحافظ على وجهها من التجاعيد وتكماش.

وحسب كلامها، فالأول كانت فمدرسة كاثوليكية، فين الضحك ما كانش مقبول، ومع الوقت ولات هاد العادة أسلوب حياة، تيس كتقول إنها فضلات تمنع عضلات وجهها من الحركة عوض تستعمل البوتوكس أو كريمات مقاومة الشيخوخة، وكتعتبر أن هاد الطريقة خلات بشرتها تبقى شابة.

من الناحية العلمية، أطباء الجلد كيأكدوا أن تقليل حركة عضلات الوجه فعلاً كيعاون على تأخير ظهور خطوط التعبير، وهي نفس الفكرة اللي كيخدم بها البوتوكس، حيث كيرخي العضلات وكيحد من التجاعيد اللي كاتبان مع الضحك أو التقلاق.

ولكن خبراء الصحة النفسية عندهم رأي اخر، وكيشددوا على أن الحرمان من الضحك ماشي صحي. حيث كيعاون فإفراز هرمونات السعادة بحال الإندورفين داكشي علاش شباب البشرة ما خاصوش يكون على حساب الصحة النفسية وجودة الحياة.