كود الرباط//

وزير التربية الوطنية والتعليم الأولي والرياضة، محمد سعد برادة، علن اليوم الجمعة 19 شتنبر فندوة صحافية، أن اللغة الأمازيغية غادي تولي جزء رسمي من مشروع “مدارس الريادة” ابتداءً من هاد الموسم الدراسي.

برادة وضح فالندوة المخصصة للدخول المدرسي: “غتبدا الأمازيغية هاد العام فمدارس الريادة، وكُتبها غادي يخرجو فآخر الشهر الجاري.. وغنبداو ندرسوها بحال الفرنسية والإنجليزية”.

هاد الإعلان كيجاوب على واحد من المطالب القوية للفعاليات الأمازيغية، اللي بقاو كيناضلو منذ إطلاق مشروع الريادة باش ما يتمش إقصاء الأمازيغية من هاد الورش الإصلاحي الكبير.

جمعيات وشخصيات مهتمة بالشأن الثقافي واللغوي كانت شافت أن تغييب الأمازيغية فمرحلة أولى كيعتبر “تراجع” على مكتسبات مهمة فمجال الحقوق اللغوية والثقافية اللي ترسخات فالدستور والسياسات العمومية.

دابا، ومع إدراج الأمازيغية رسميا، كيتأكد أن الوزير برادة بدا يتجاوب مع هاد نضال الفعاليات الامازيغية بدمج هذه اللغة فالمسار الإصلاحي، باش تولي جزء من تكوين التلاميذ فمدارس الريادة بحال باقي اللغات الأساسية.