كود الرباط//

أكد مسؤول بوزارة التعليم العالي والبحث العلمي والابتكار، لـ”كود” بأن الوزير عبد اللطيف ميراوي، يتابع عن كثب نتائج تصويت مكاتب طلبة الطب بعدد من كليات الطب والصيدلة بالمغرب، على العرض الحكومي، موضحا بأن النتائج تتجه نحو حل أزمة الإضرابات المتتالية.

وقال ذات المسؤول لـ”كود” مكاتب الطلبة بالرباط وطنجة وفاس صوتو اغلبية باش يدخلو ويدوزو الامتحانات، في حين طلبة مراكش ووجدة صوتو ضد.

لكن المشكل حسب المسؤول هو أن عدد من طلبة الطب والصيدلة مشاركوش فالتصويت خصوصا الطلبة لي ضد المقاطعة واللي كيدخلو يقراو، اضافة إلى أن بزاف ديال الطلبة مجاوش للتصويت ومبقاوش باغين يدخلو فلعبة “الكر والفر” بين الدولة والطلبة.

مشكلة أزمة طلبة الطب هي “اللجان” لي كيفرضو لي بغاو، هاد اللجن مبقاتش كادير دورها الطبيعي بل كتلعب دور لجن شعبية واحيانا كتوصل تصرفاتها “للبلطجة”، عبر توزيع اتهامات وممارسة “الترهيب النفسي” ضد كل من عبر على رفضه للاضراب والمقاطعة.

وحسب مصدر رسمي لـ”كود” فإن طلبة الطب والصيدلة وطب الأسنان فالرباط وطنجة وفاس دارو نية، ولكن خاص الاخرين يلتحقو بهم.

وأفاد ذات المصدر، بلي الوزارة دبا كتوجد الامتحانات، بحيث تقرر يكونو مور العيد، أي تقريبا نهار 26 يونيو وغايتعطا وقت للطلبة يوجدو، مؤكدا بلي الاغلبية ديال الطلبة باغا تجتاز الامتحانات بلا مشاكل.

دبا حسب المصدر المسؤول لـ”كود” فإن جميع المطالب تقريبا تحققت ومبقاش سبب معين باش تستمر المقاطعة، مؤكدا بلي تبين أن صحاب مصالح خصوصا بعض الأطباء الأثرياء ومالين اللحايا تحالفو ضد الوزارة لأنها مست مصالحهم فاش قلصت سنوات الدراسة يعني ميمكنش يخرجو يتابعو القرايا ففرنسا باش يحبسو هجرة الأطباء.