وكالات//

تصابو ثلاثة ديال الناس، جوج عيالات ورجل، بجروح خطيرة من بعد ما طاحت واحد هيليكوبتير ديال الإسعاف فوق طريق سيّار عامر بالحركة فمدينة ساكرامنتو، فولاية كاليفورنيا فميريكان، وهادشي دار روينة وبلوكاج فحركة السير.

وحسب ما قالت السلطات المحلية، الحادثة وقعات مع السبعة دالعشية فالممرات اللي كتمشي فالشرق فالطريق السيّار رقم 50، قريب لخروج ديال زنقة 59. وبيّنات فيديوهات ديال الحادث أن المروحية اللي تابعة للخدمات الطبية فالهوا فقدات السيطرة قبل ما تضرب فالطريق.

كان فالمروحية ثلاثة ديال الناس من الطاقم الطبي: البيلوط، وممرضة، ومسعف، وتكرفصو كاملين وهزوهم للسبيطار وحالتهم كانت خطيرة، ودّاوهوم رجال الإنقاذ ديال الوقاية المدنية فساكرامنتو.

رجال المطافئ قالو بللي شي ناس من اللي كانو دايزين وقفوا باش يعاونو، وقدرو يرفعو شوية من المروحية باش يخرجُو واحد من المصابين.

والتحقيق مازال مفتوح باش يعرفو شنو السبب اللي خلا المروحية تطيح، والسلطات باقا كتفحص المكان وكتجمع الأدلة.