عمر المزين – كود///

أعلنت هيئة الدفاع على الأستاذ راشد الغنوشي، فبلاغ صادر عنها من تونس، اليوم الإثنين، أن منوبها تنقل للمستشفى من 12 يوم، أي نهار 29 جويلية، ومن داك الوقت تفرضات عليه عزلة تامة، مع منع المحامين ديالو والعائلة ديالو من زيارتو أو التواصل معاه، وحتى من الحصول على أي معلومة على الوضع الصحي ديالو، رغم الطلبات المتكررة اللي تقدمت بها الهيئة لمختلف الجهات المعنية.

وأفادت هيئة الدفاع أنه، فظل هاد الحجب التام للمعلومات، بلغ ليها أن الأستاذ راشد الغنوشي دخل من خمسة أيام، أي منذ الخميس 6 أوت الجاري، فإضراب عن الطعام والدواء احتجاجاً على العزلة المفروضة عليه وحرمانه من أبسط حقوقه، واعتبرت الهيئة هاد الخطوة وسيلة أخيرة للدفاع على هاد الحقوق.

وقالت هيئة الدفاع إن الغنوشي، اللي عندو 85 عام وكيعاني من وضع صحي دقيق، كيتعرض، حسب البلاغ، لـ«تنكيل وحشي ولاإنساني»، واعتبرت أن هاد الوضع كيشكل انتهاكاً خطيراً لحقوقه الأساسية ولسلامته الجسدية.

وحملت هيئة الدفاع السلطات التونسية كامل المسؤولية على هاد التجاوزات وعلى أي مضاعفات خطيرة ممكن تترتب عليها وتهدد صحة منوبها وحياته.
وطالبت الهيئة بتمكين محاميه وعائلته من زيارتو والاطلاع على الوضع الصحي ديالو.