سهام البارودي- كود//
أنا بعدا شخشيا كانفرح فاش كانشوف شي مغربية كادوي ! غا كاتحل فمها باش تدوي كانفرح ليها! نقدر نتافق معاها و لا نختالف معاها (في حالة مايسة راه كانتافق معاها و بزّاف) و لكن غانفرح فاش غانشوفها خارجة بوجها و كاتهضر و كاتشارك الآراء ديالها مع الناس.
حنا راه مجتمع جاي من بعيد خلاوها الگور
“On vient de loin”
راه تال لهنا لهنا و جدّاتي كاتعاود ليا بلي الرجال كانو كاياكلو هوما الأولين و لا شاطت شي حاجة فالطبسيل كاتحط للعيالات و الدراري الصغار و غالبا ماكايشيط والو، راه الراجل كان يقدر يداوي البهيمة لامرضات ليه و مرتو لاضراتها الضرسة يقوليها سيري شربي الشّيح ! و دابا حاليا مازال عندنا الأمية طالعة فصفوف العيالات و مازال عندنا الاغلبية د العيالات جالسين فالدار ماكايخدموش و ماعندهمش استقلالية مادية، و مازال عندنا العيالات كاياكلو العصا و التجنديخ و ماتقدريش تخرجي معطلة و ماتقدريش دخلي معطلة و كاين شي قهاوي و شي أحياء و شي بحورة و شي بلايص التواجد ديالك فيهم كمرا غير مرغوب فيه ! وا جربي سيري غا لشي غابة مثلا ديري فوتينغ و شوفي واش غاترجعي بگرصونك و لا واش غاترجعي أصلا ! و حتى هاد لاجينيراسيون الجديدة لي كنا كانترجّاو فيها الخير خرجو فيها شي عوجين الرّاس، غا الخايب على خوه، لا زين لا قلدة و غالبا الجيب ايخوان و السب إيلوان، باش يقولو لينا المرا تقرى والايني حدها السادس و لا للزواج بموظّفة، و كون ماكانش عندنا سيدنا الله يخلف عليه لي عطانا المدونة كورا مازال “علاّل” كايبات مايصبح و يخلي المرا واحلة بستة ديال الدراري فخميس متّوح و يمشي يضربها بتجويجة فنواحي أزيلال مع مرا جديدة و يدير ولاد جداد و حياة جديدة و يسمّي راسو “الغوتي” فحال داكشي ديال برنامج حماية الشهود لي دايراه الايف بي آي !
دونك ! فاش كاتشوف هادشي كلّو و هاكاك مازال كاينة شي مرا تقدر تقدر تخرج بوجهّا باش تهضر و تعبر على الآراء ديالها و تقول “لاّ” قدّام الجيوش ديال الدوثراكي راه ها بوجور ديالها !
بالنسبة لرمضان، راه النقاش ديالو بدا شحال هادي فالمغرب فاش كانت مايسة مازالة كاتعيش في كنف الصحوة الإسلامية، و هاد النقاش/ الصراع تشدو عليه ناس فالحبس و تقاتلو عليه و لا حياة لمن تنادي، القانون المتخلّف لي موروث على الاستعمار و ماعندو أصلا حتى شي سند ديني الدولة ماباغاش تحيدو… الدولة مطلعة لينا “ڤي” فهادشي ديال الحريات الفردية كاملة، عوض أنها تكون سبّاقة لحماية حقوق الأقليات، كاتساين، ماعرف آش كاتساين…
الحضارة و التمدّن ماكاتكونش غير بموروكومول و اكبر تيران فإيفريقيا و التيجيفي و RER، و لوطوروت ، الحضارة و التمدّن، أخلاق و قوانين و مؤسسات خدمتها أنها تحمي المواطن و تصون الحرية ديالو سينو راه كلشي غير زواق من برّا، عكر على الخنونة، أو آي لاينر على شعيرة.
