كود مصطفى الشاذلي ////

البارح لخميس 19 يونيو 2025 بالمركب الرياضي محمد السادس بمعمورة فسلا دارت الجامعة الملكية المغربية لكرة القدم لقاء بين الصحافة الوطنية وبين مدرب الاسود وليد الركراكي. حضر فاللقاء فاللول رئيس الجامعة فوزي لقجع ومن بعد خلى الصحافة مع المدرب.

اللقاءات بحال هادو مفيدة. واخا يكون فاول منافسة بحال حوار الصمكين، ولكن ماشي مشكل.

الركراكي فاول مناسبة تعطاتو، هاجم الصحافة. بلا سبب مقنع. جمعهم فسلة وحدة. هدر بلا اساس منطقي. هدر على اوهام ما عندو الا فراسو. كرر كثر من مرة باللي الصحافة المغربية =جمعها= ما بغاتش تخرج من اقصاء الاسود ضد جنوب افريقيا فكأس افريقيا الاخيرة بسان بيدرو بالكوت ديفوار. نسى باللي هو اللي خرج راسو من كأس افريقيا فمشكلة مدافع الكونگو سانشيل مبيمبا. قلب عليها وكانت عندها تبعات، اكيد شتتات تركيزو.

السي وليد حتى حد ما ضدك. الصحافة المغربية ماشي غير معاك، بل كدافع عليك واخا كدير ماتشات كتركب الخلعة فعشاق الاسود. راه مدرب بحال ديديي ديشان مدرب فرانسا ربحهم كأس العالم فروسيا 2018 كياكل ما ياكل الطبل من صحافة فرانسا. ما عمرو خرج وقال راكم ضدي وما بغيتونيش نربح. اجوبتو ديما، من حقكم تنتاقدوني.

الركراكي كيحرق طاقة كبيرة بزاف بزاف فامور تافهة. فاوهام ما كايناش. راه على داك اللعب اللي كديرو، خاص انتقادات حادة ليك. البارح قال ليه صحافي ما معناه: حمد الله عندك صحافة بحال ديالنا. ظريفة معاك بزاف.

الركراكي دخل متوتر فلقاء البارح وخرج وما حيدش ديك الهلوسات ديال شي حد كيستهدفو.

عندو مساعد ديالو رشيد بنمحمود. خاصو يرجع ليه عقلو. من حق لمغاربة شعب وصحافة ينتاقدك. يطالب برحيلك كاع. هاد الشي خاصو يكون دافع يخليه يربح ويجيب الكاس اللي نص قرن ما جبناها.

الركراكي خاصو يركز على الكورة. وايلى كان شي مغاربة ما بغاوكش تجيب الكاس، ما فيها مشكل. حتى حاجة ما فيها اجماع فالبلاد بما فيها الملكية. عندنا حزب ضدها ومعتارف بيه.