كود سبور//

أعلن هلال الطير مدرب اتحاد طنجة، عن فتح تحقيق فشكوك تعرض الجنوب إفريقي رولاني موكوينا للسب والشتم، من طرف عناصر من اتحاد طنجة فالتيران خلال ماتش الفريقين، البارح السبت فالعربي الزوالي برسم الدورة 10 من البطولة الاحترافية.

وقال هلال الطير فتصريح له من ورا الماتش على الواقعة: “أنا ما كنتش حاضر للواقعة.. ملي صفر الحكم نهاية الماتش شفت موكوينا بغيت نسلم عليه بان ليا مشغول ودخلت للفيستيير، وما حاضرش لشنو وقع وما عنديش معطيات”.

ووضح هلال الطير: “واش تعرض لشي مضايقات؟ أنا غاندير لونكيت ديالي ونواعدكم غاندير لونكيت ديالي، وحنا اللي ما يحترمش الخصم، غاتكون عندو هادي هي آخر مقابلة، غير خاص تكون عندي المعطيات دقيقة باش ما نظلمش الناس، وكل واحد فورقة الماتش او من المرافقين ما يمسش بصورة الفريق، حنا الجمهور كايحترمنا وكانحتارموه، وصفر الحكم سالا الماتش نقطة نهاية”.