أميمة عطية ـ كود كازا ///

فيلم “المطرود من رحمة الله‘‘(Thank You Satan)  ديال المخرج هشام لعسري مازال خالق جدل كبير فالأوساط السينمائية، بين نقاش على حرية الإبداع، وعلى لخنقة لفكرية، من بعدما تم لمنع ديالو في قاعات سينمائية فمراكش .

” كود “تاصلات بمخرج الفيلم وفتصريح خاص لـ“كود”، كال هشام لعسري، باللي الفيلم طرح مشكل عند بزاف ديال الناس، لكيسيرو قاعات سينمائية، اللي طلبو منو يحيد العنوان الإنجليزي “Thank You Satan” حيت قالو ليه انه كيبرزط، ولكن هو رفض بشكل قاطع.

وصرح لعسري، باللي لعمل مقدس بنسبة ليه، وبلي المركز السينمائي المغربي شاف الفيلم ومنحو الترخيص اشوفوه قل من 16 عام، وهو لي كيأكد أنه داز من المساطر القانونية ديال العرض.

ومن جهة أخرى، انتقد لعسري الوضع ديال سينما المؤلف فالمغرب، وكال إنها كتعاني من الإقصاء غير المباشر، وشار لعسري أن القاعات السينمائية ولات كتسوق غير الأفلام لكوميدية لي عائلية وخاصها تكون فتلفزة وبلاصتها ماشي سينما حيت معندها حتى فكرة إبداعية نقدية .

وختم، لمخرج وكال بعض مسييرين ديال لقاعات ولاو فُقهة حتا هوما كيحلو واحرموا وافهمو فالسينما.

ومن جهة نقدية، كال الناقد السينمائي والمخرج ورئيس اتحاد المخرجين والمؤلفين المغاربة عبد الله الجواهري، لـ“كود”، باللي فيلم لعسري كيبقى من أهم أعمالو، حيت كيعالج ذهنية التحريم والتكفير بلغة سينمائية قوية وجريئة.

وضاف باللي هاد النوع ديال الأفلام كيقلق بعض الجهات اللي كتشوف فيه تهديد لسلطتها الرقابية على الإنتاجات الإبداعية.

وزاد: “اللي كيدفع للتحريم غالباً هو اللي كيهرب من الحقيقة، و”الصورة كتفضحو‘‘.

وشدد الجواهري على الرفض ديالو لأي تضييق على حرية التعبير ولا محاولة خنق الإبداع، واعتبر أن الهجمات ومحاولات المنع اللي وقعات كتدخل فباب الجهل والتضييق على الحريات.

وعلن فالختام، تضامنو المطلق مع لعسري وشجع حرية الإبداع بحب وسلم.