كود ـ كازا//

تفجر جدل واسع فالساحة السينمائية المغربية بسبب الفيلم السينمائي ’’المطرود من رحمة الله (Thank You Satan) ، من إخراج هشام العسري، وبمشاركة عدد من الممثلين المغاربة إلى جانب وجوه أجنبية، من بينهم Thomas Scimeca فدور البطولة، إلى جانب أليزي كوست ونادية كوندا وأبوبكر بنساعي، إضافة إلى جولي غاييه وهنري ليبمان وحسن بديدة وصالح بن صالح.

وجاء هاد النقاش خصوصا من بعد نشر المقطع الترويجي ديال الفيلم على مواقع التواصل الاجتماعي، واللي خلق موجة انتقادات واسعة، حيث اعتبراتو بعض الجهات كيتضمن مشاهد صادمة ومسيئة لرموز دينية، وهو ما فتح نقاش كبير بين حرية الإبداع وحدود احترام المقدسات.

وفهاد السياق، تقدمات جمعية “ربيع السينما” بشكاية رسمية، دفعات رئاسة النيابة العامة للتدخل وإحالة الملف بشكل استعجالي على الوكيل العام للملك لدى محكمة الاستئناف بالدارالبيضاء.

تواصلات “كود” بشكل مباشر مع المخرج هشام العسري لمعرفة الموقف ديالو من الجدل الدائر.

وقال العسري فتصريحو لـ“كود” بلي هو ما باغيش يدخل فالنقاشات ولا فالصراعات المرتبطة بالجمعيات، وكيأكد بلي دابا مركز غير على السينما والإبداع وعلى تطويرها فالمغرب، وكيختار يبقى محايد ومتحفظ فهاد الموضوع، وما باغيش يدخل فهاد النوع ديال الجدل أو ايستاغلو فقط من أجل الإشهار .

وزاد العسري، موضحا بلي الدور ديالو كمخرج سالى فهاد العمل، بحال المنتج والممثلين، وأن الكلمة الأخيرة خاصها تكون للجمهور، كما أشار بلي المركز السينمائي المغربي شاف الفيلم وخلا التقييم النهائي للمتفرج.

وختم بالقول بلي القانون هو اللي غادي ياخذ مجراه، وهو اللي غادي يحسم فهاد القضية،  والكلمة الأخيرة كتبقا للمتفرج المغربي .

وللإشارة فقط، من المرتقب الفيلم يخرج للقاعات السينمائية الوطنية ابتداءا من هاد الشهر  أبريل، مع عرض أول محدد فـ5 أبريل، وسط ترقب كبير وردود فعل يمكن تكون متباينة.