كود سبور- طشقند//

أكد هشام الدگيگ مدرب المنتخب الوطني المغربي لكرة القدم داخل القاعة، أن الرباح فالمونديال على تاجيكستان كان هو أهم حاجة على اعتبار ان المباراة فكوب ديموند ديما كاتكون صعيبة، والفروقات بين المنتخبات ما كاتبدا تبان حتى كاتدوز المباريات.

وقال هشام الدگيگ فتصريح لـ گود: “بعدما المنتخب المغربي للفوتسال ربح تاجيكستان بنتيجة 4 لجوج اليوم الاثنين، برسم الجولة الاول من مونديال كرة القدم داخل القاعة “أوزباكستان2024”: “الجميل اليوم هو لعبنا ماتش ديال الفوتسال الحقيقي، حيث كايكون الخصم وجد خط واستراتيجيات والمنتخب التاجيكستاني ما كان عندهم ما يخسرو وهدفهو كان هو يديرو ماتش كبير داكشي علاش كنا حنا تحت الضغط وهذا الشي قلتو شحال من مرة واللي خاص يعرف المتتبع أن هذه المباريات تختلف على المباريات الأخرى وفيها عنصر المفاجأة وأخطاء وعوامل اخرى اللي كاتحيد مع مرورو المباريات”.

وزاد وضح الدگيگ: “ما نزربوش على الحُكم وهذا وقت التشجيع وانا متأكد أن المنتخب المغربي غايكون احسن فالماتشات الجايين، وانا كنت منتظر ماتش اليوم غايكون هاكدا، وعارف الأسلوب الآسيوي، واي منتخب غانلعبو معه غايدخل بنفس الطريقة وملي كاتبدا تدخل فالمنافسة عاد كاتبدا تبان الفروقات غير حنا ولفنا أن المنتخب المغربي كايلعب مع منتخبات ما كاتكونش مهيأة وفكاس العالم گاع المبارات غاندوزوهم بهذا الشكل والاهم نجيبو 3 بوان بأي طريقة”.