كود سبور//

لجأ هشام آيت منا رئيس الوداد الرياضي إلى الرئيس الأسبق للنادي عبد الإله أكرم، باش يحل المشاكل اللي عندو حاليا فالفريق وعلى راسها ملف المدرب الجنوب إفريقي رولاني موكوينا، وهو ملف حريرتو حريرة، لدرجة أن آيت منا عطى لموكوينا عطلة بداعي أنه عندو ضغوط نفسية واخا اتفق معه على الفراق، ولكن ما قادرش يعطيه الشرط الجزائي اللي بقيمة مليار مقابل فسخ العقد، وقاليك كايتسنى حتى تسالي البطولة باش يجري عليه.

وحسب مصادر مطلعة، فهشام آيت منا حاول يقنع عبد الإله أكرم باش يرجع للتسيير فالوداد الرياضي، ويدخل معه فالمكتب الحالي، هو وصحابو اللي كانو معه فتسيير الوداد ملي كان رئيس، ولكن أكرم ما بغاش ورفض عرض هشام آيت منا، وأكد له بلي ما عندوش حاليا فكرة الرجوع للتسيير فالوداد الرياضي.

نفس المصادر، وضحت أن لجوء هشام أيت منا لعبد الإله أكرم جا بسبب المشاكل اللي طيح فيها الرئيس الحالي للوداد راسو والتسيير العشوائي، والوحلة اللي واحلها دابا مع المدرب رولاني موكوينا، اللي خاصو يعطيه مليار باش يفسخ معه العقد، ويفك معه الجرة.