وكالات//

شدو البوليس ديال تركيا، واحد المواطن ديالهم، دار بوم في السوشيال ميديا بعدما بان وهو كيهدد سياح سعوديين بالموس، وكيعايرهم بعبارات عنصرية.

وبعد ساعات قليلة من الانتشار الواسع للفيديو لي بان فيه وهو هاز جنوية وكيسب في العرب، ودار حالة رعب في نفوس السياح السعوديين لي كانو جالسين في قهوة وكيهضرو بالعربية، علنو البوليس أنهم شدوه.

ونتاشر فيديو آخر بشكل كبير بزاف وهو كيبين البوليس رابطين هاد السيد ومخرجينو من دارو.

وكيجي هادشي في الوقت لي كتعرف فيه مدينة قيصري ومدن أخرى في تركيا توترات بسباب اللاجئين السوريين.