كود كازا//

كايعيشو بيضاوا معاناة مع مشاهد كتكرر يوميا، سبابها التخلف وتاهرگاويت، فعدد من شوارع مدينة كازا، وهاذالمرة أبطالها هرگاوا ديال النقل المدرسي اللي عاطينها لاحتلال الطروطوارات، ورجعوها باركينگات لطوموبيلاتهم، والراجلين يمشيو وسط الطريق وهذا الشي كيشكل خطر عليهم وخصوصا الأطفال والعيالات والمسنين اللي ما بقاوش يقدرو يمشيو بأمن، وخايفين من شي طوموبيل ولا موطور يضربهم.

بحال هاد التصويرة اللي نشر جورنال “گود”، واللي تصورت بالقرب من واحد المؤسسة تعليمية خصوصية، كاتبين كيفاش طرونسبور سكولير فوق الطروطوار، وشدوه كامل، مانعين مرور المارة، وهذا الشي خلا بزاف منهم يهبطو للطريق الشي اللي كيشكل خطر عليهم بسبب حركة السير الكثيرة، ورغم وضوح المخالفة، إلا أن السلطات المحلية وأجهزة شرطة المرور لم تتدخل لوضع حد لهذه الفوضى، ما يطرح أكثر من علامة استفهام حول مدى التزام المسؤولين بحماية سلامة المواطنين وتطبيق القانون.

وكايحملو بزاف من السكان المسؤولية للسلطات، وكايطالبوها بتفعيل المراقبة الدائمة ومعاقبة المخالفين دون تهاون، باش يحميو الأرواح د الناس ويضمنو احترام الفضاء العمومي، وكيبقى السؤال المطروح هو حتى لإمتى غاتبقى هاد الفوضى وشكون غايتحمل المسؤولية ديال شي روح إلى طاحت بسبب هذا الخرق ديال القانون.