أنس العمري – كود///

كيتواصل فالمغرب تشديد القبضة على بارونات تهريب المخدرات اللي عندهم امتدادات أوروبية، فإطار تعاون أمني دولي كيتقوى نهار على نهار.

فهاد السياق، قدرت المصالح الأمنية المغربية، الجمعة، توقف مواطن بلجيكي عندو 39 عام، سميتو غلين س.، كان مبحوث عليه دوليا بسبب أحكام قضائية ثقيلة صدرت فحقو فبلادو على خلفية قضايا مرتبطة بتهريب الكوكايين.

مكتب الادعاء العام فمدينة أنتويرب البلجيكية أكد أن هاد التوقيف وضع حد لمسار فرار دام مدة، من بعدما غادر مدينة رومست واختار المغرب كمكان للاختباء، غير أن يقظة الأجهزة الأمنية والتنسيق المحكم بين الرباط وبروكسيل سرع بسقوطو.

دابا، ولى المعني بالأمر رهن مسطرة التسليم للسلطات البلجيكية، باش يينفذو فحقو الأحكام السجنية اللي صدرت ف حقو.

وبحال عدد من الأسماء الكبيرة اللي طاحت فشبكات الجريمة المنظمة خلال السنوات الأخيرة، لعب تفكيك نظام المراسلة المشفر (Sky ECC)، دور أساسي فالإطاحة بغلين س، بعدما كشفات المحادثات المعترضة تورطو المباشر فتهريب شحنات كبيرة ديال الكوكايين عبر ميناء أنتويرب، بتنسيق مع عناصر إجرامية معروفة، من بينهم شخص كيتسمى بول جوس.

وكان القضاء البلجيكي حكم على غلين س. العام اللي فات بالسجن أربع سنوات فمدينة أنتويرب، قبل ما يصدر فحقو حكم ثاني بست سنوات سجنا فمدينة لوفين، وهو الحكم اللي مازال معروض دابا على محكمة الاستئناف.