سهام إباروري- كود
—
هاد المقال المقدمة ديالو كاتشبه للدخلات لي كايديرو هادوك لي كايبيعو دوا البرغوت و لكزيما فكيران حد ولاد فرج وبن مسكين !
ازيدو زيدو زيدو ! اللي باغي يطيح الصرف و اللي كيحلم يخدم من دارهم ! وللي مافيه مايمشي يدوز شي كونكور و يضارب مع السيفيل على طرف د الخبز ! للي ماقادش على الفياق مع الستة د الصباح و لي ماعندوش الكتاف ديال البالة و الفاس ! لي باغي يعيش بالصالير د مهندس واخا هو ماعندوش الباك ! و لي باغي يولي مشهور ويتصورو معاه الناس فالزنقة بلا مايكون ممثل و لا مغني ! هادشي كلو ولى ممكن مع مهنة بودكاستور ( بنادم كايدير فيديوات و كايلوحهم فيوتوب) فحال الشكل د مول الرابوز و مريضوفرين …و باش تكون بودكاستور ناجح و دخل الصرف راه القضية ساهلة:
1-بالنسبة للماطريال راه غير بيسي و كاميرا ولا تيليفون و كاميرا وانتيرنيت وزيد عليهم واحد تلاثة ميترو د الثوب باش تغطي الحايط ديال خربتكم و على الله فليتوكل المتوكلون!
2-باش تكون بودكاستور ناجح و تعرف تستغل بنادم خاصك ديما دير فيها سبارطاكيس محرر العبيد ! و باش يشوفك اكثر عدد من الناس خاصك تعرف انو الهايش مايش هوما الاغلبية المسيطرة فالفايسبوك و اليوتوب ! اه نعام ا سيدي لا كنتي غاتوجه هضرتك للنخبة المثقفة وليدات المدارس العليا و الناس ديال كلية الفلسفة راه القضية ماغاتصدقش و غايتفرجو فيك غي صحابك !
3-عنداك تكون مكلمن وكتلبس مزيان وباين عليك كابر بدانون! البودكاستور الناجح هو البودكاستور لي كايشبه للشعب ! يكون خويب و سنانو مراكبين و باينة فيه طالع بالخبز واتاي ! حيت لا بنتي نقيقي و مع الهايش مايش عندو مركب النقص من ولاد الفلوس راه غايحقد عليك و ماغايحملش يشوفك فاليوتوب ! ها علاش من الافضل البودكاستور يكون كايشبه للهايش مايش و يحس بيه قريب ليه منكم و اليكم !…
4-لا عندك شي قويميجة زويونة ولا شي دار مفرشة بالطلامط د البهجة من الافضل ماتصورش بهم ! شوف شي تريكو كاشف بالشمش و شي arriere plan مقودة عليه ! حيت المغاربة كايتفاعلو مع بنادم فقير و حازق و كايحقدو على بنادم غني و باينة عليه كابر فالخير و بنادم عندنا حازق كايعجبو يشوف بزاف د الحازقين فحالو باش يبرد على راسو داكشي علاش البودكاستور الناجح خاصو يمثل الحزقة د الشعب !
5-تعلم تسمر على الممثلين و المغنيين و السياسين و تسناهم يديرو شي تويشية و علق عليها بشي فيديو و من الاحسن يكون الفيديو ديالك فيه داك التهلال من قبيل ” اللهم ان هذا لمنكر ” ! لا كان ممثل و لا مغني قوليه ” كاتخربو الافكار د الشباب و كاتحاربو الاسلام” و لا كان سياسي قوليه ” وا كليتو فلوس الشعب ! فيناهوما فلوس نا ! فيناهوا رزق نا” واخا نتا ماكاتخلص تا ضريبة و المنتوج الوحيد لي كاتنتج للمغرب هوا الخرا لي كاتساهم بيه فخنق شبكة الواد الحار ماشي مشكل … نتا ديما خاصك تلعب الدور د سبارطاكيس !
6-احسن فريسة هوما الممثلات و المغنيات ! اه كايموت عليهم الهايش مايش يسمع عليهم شي حاجة ناقصة !و البودكاستور الناجح هو البودكاستور الحكار لي كايحط على الممثلة و لا المغنية و يبقا لاصق ليها لي دارتها يعلق عليها بالسلب طبعا و يسبها فحال داكشي لي طرا للداودية مؤخرا و قبل منها امل صقر و قبل منها دنيا بطمة … ماشي مهم داكشي لي كاتقول واش كاين ولا ماكاينش المهم هو الفراجة حيت الهايش مايش عزيز عليه يتفرج فالمطايفات و المعيور و السبان …
7-عنداك تقودها شي نهار مع الهايش مايش و تفكر دافع على الحريات الفردية و المثليين و وكالين رمضان راه تقدر تخسر داكشي كامل لي بنيتيه ففيديو واحد! واخا تكون ماكاتعرفش القبلة فين جات البودكاستور الناجح هو لي كايعرف ينافق و يلحس الكابة للبشري لي تابعو … كون ديما ضد المثليين و عاملات الجنس و وكالين رمضان و بان مسلم متقي الله و تشكى من الداودية و عطيني صاكي …و طالب باش العيالات يديرو الحجاب … مهم راك عارف نتا ديما كون مع الرابحة!
8-ماتنساش دير فحال كاع البودكاستورات تانتا و تقول للناس بيلا الحياه فالمغرب مهزلة ! الممثلات قح*** والمغنيين زو*** و السياسين شفارة ولكن فخاطرك دعي باش يبقاو و يزيدو فيه حيت نتا واكل طرف د الخبز معاهم و بسبابهم نتا كاتشهر و دير بلاصتك و تصور فليسات ! تخايل المغرب بلا الداودية و دنيا بطمة و سينا و بنكيران و الشباط و سعد المجرد و لطيفة احرار و الزمزمي ؟ راه البودكاستورات يهبطو الريدو و يموت ليهم الحوت ! قطيع الرزق عاين باين ! و كلنا عارفين شحال صعيب على شي حد والف ياكلها باردة باليوتوب و راس مالو غي الهضرة باش يرجع انسان عادي و يضارب مع السيفيل على طرف د الخبز !
و طبعا اخيرا و ليس آخرا ديما سعا بنادم يدير ليك جيم و يبارطاجي الفيديو ماشي حيت نتا باغي دير خير فالهايش مايش و توعيه و تنشر الاخلاق و المبادئ … لا لا راه الصرف كاين تما و كولا جيم و بارطاج بثمنها ! وا سعا لي جيم و البارطاجات و خلي البشري يتبعك ملور..نتا صور الصرف و الهايش مايش يصور القلاقل .
موضوعات أخرى
صراحة مقال جميل و حقيقي و ليس لي اعتراض سوى على كيران اولاد افرج هههههه لان اولاد افرج ما فيهاش محطة ديال الكيران و اللي كا يجو لسوق الحد باش يبيعو الدوا لا علاقة باولاد افرج ومن الافضل عدم الاشارة لاي منطقة فالمغرب باي نوع من السخرية
وهل انتي وهذا الموقع كله يصنع القنابل النووية؟ الافضل لهذا الموقع ان ينشر البورنو مباشرة عوض التخفي وراء كلمات والفاض. اختاه كلكم في الهوى سوى وخلي داك الجمل راقد. وانتب تستعملين الدارجة لانك لا تتطيعين صياغة هذا المفال بلغة عربية سليمة وتعلمين ان الاغلب يحب مقل هاته المقالات بالدارجة لرفع عدد الزوار للموقع وجمع الليكات والبرطاج ليرتفع عدد الكليك و impression على الاشهارات التي تغطي كل الموقع. عل الاقل وحتى وان كنت ضد الميوعة بالبودكاستين المغربية فهم يبدلون مجهود وا حصلو عل اموال فهم لا يسرقون . المهم لي فراس الجمال فراس جمالة ولا انتي جديدة ومعارفاش منين تيدخلو لفلوس دهاد الموقع. انك تشتمين نفسك. فقط هذا بودكاست ردئ مكتوب وهم بودكستا رديئة مصورة.
bravo, vous avez raison
التعليقات جاو ضدك حيت قستي المقدسات د الأغلبية، انت أولى بنصائحك هههههه الله يصبرك
c’est quoi ce style et ces mots on dirait que tu as passé ta vie dans les rues et ……et dire que tu appartiens à la gent féminine…..quel niveau ! je suis désolée mais tu fais pas mieux
oui hadchi kayn ms ana mafiya liydir lvidiowat onsada3 kari n9dar ghir nktab mra mra fchi maw9i3 bhal goud ontala3 msirif ghir khasak tktab chihaja i9raha bnadam oyrja3 i9ra lik mra khra wakha mastafad walo man lmra lowla obach twsal had nivo khasak tkon mamtalk ba3d lmalakat lfikriya nti banti liya katab3i nafss loslob ya3ni 3andna nafss lmalakat laykhalihom lina hhhh
هم ينتقدون اخرون ليرتزقو وانتي انتقدتيهم لتسترزقي وانا انتقدتكي لكي تتواضعي و تعرفي نفسك انك مريضة و عندكي نقص شديد وادا اردتي علاج انا في خدمة مجانا
و الله إلا كاينة، اللي حفات ليه دابا تايدوز ليويوب، حتى كلمة بودكاست حرفوها من المعنى ديالها الحقيقي.
و نتي كاتستعملي نفس الاسلوب واخا الطريقة مبدلة لكن المضمون نفسو حتا نتي و بزاف ديال دوك الي سحابليهم راسهم صحافين و زعما بتاكرو اسلوب جديد فالصياغة ديال النصوص المقالات زعما بالمفهوم ديال الصاحفة حتا نتي قلبتي على موضوع استهلاكي حيت اولا قلبك عامر على هادكود البودكاسترز تانيا باش تفرغي داك المكبوتات ديالك الي هي عبارة عن سبان و معيور فالناس الي كايختالفو معاكم حيت كايشوفو مول الكاسكيطة و سكيزوفرين شديتي موضوع ديجا بقوة ما بقيتو كاتصبنو فيه ولا كاشف زوقتيه بشوية ديال الدارجة حيت اللغة العربية الفصحى واعرا عليك و بطبيعتها لغة راقية و و بالنسبة للسعايا راكوم متشابهين فبزاف ديال التفاصيل و حتا نتي النيفو طايح ما تجيبي راسك حتا فشي مجال من غير الكتابا بهاد الطريقة
يوزع ،،، حلوااا ،،،، و Goooool
تقبتلها الورقة الله يكتر من مثالك
ssara7a ketro nassa ssofaha2e ssawa2e fe elmawa9i3e ikhbariya wla 7ta hade nasse li dwiti 3lihome fe ma9alle dyalek kima kangol “elfare yenhi 3la el3are”
فلول ظنيت من العنوان أن أمر جدي جيت لقيت الكاتبة هايش مايش داوية خاوي فشي ناس لا نعيرهم إهتمام
و داوية على أتاى و دانون و هما رخاص بجوج براد ب 60 ريال
من المقال ديالك كيظهر لي بالي عندك إنفصام مع الواقع
كتبوا شي حاجة تفيدنا نتوما نيت كتهدروا بنفس النهج ديال العلوج لفيوتوب و كتشهروهم
إيوا نمينا المجتمع بكري و وعيناه
hhh kayna, khass hi santi7a w li ma3ndo nafss li ydiir had chi