الرئيسية > آراء > هذشي كيزيد من العنف ضد العيالات. الخراز خاص يعتذر على الكلام التحقيري اللي رجع المرأة المغربية بحال شي سلعة
01/04/2021 10:30 آراء

هذشي كيزيد من العنف ضد العيالات. الخراز خاص يعتذر على الكلام التحقيري اللي رجع المرأة المغربية بحال شي سلعة

هذشي كيزيد من العنف ضد العيالات. الخراز خاص يعتذر على الكلام التحقيري اللي رجع المرأة المغربية بحال شي سلعة

عفراء علوي محمدي- كود//

الضابط المتقاعد عبد القادر الخراز خصو يولي يلجم شوية، ويعرف راسو شكيخرج من داك الدلقوش، هذ الأيام مواقع التواصل الاجتماعي حاملة بمقتطف من فيديو ليه، كيهضر فيه على سوق النخاسة، والبيع والشرا ديال العيالات، بطريقة تسليعية كلها إهانة وحاطة من كرامة المرأة.

السيد ماوقفش عند الحديت على سوق النخاسة، لكن مشا خيالو بعيد لحد إمكانية تكون عندنا جوطية دالعيالات، وكيقول للمتابعين “تصورو معايا…”، وهضر على العيالات الغاليات والرخيصات، وإمكانية استبدال العيالات بحال الحوالا، والأثمنة ديالهم، وهو فرحان وناشط.

ماكيهمش واش بنية سيئة أو حسنة، وواش قاصد آش كيقول ولا لا، لكن بحال هذ الكلام فيه احتقار للمرا، اللي رجعها هكذا بحال شي بضاعة قابلة للبيع والمساومة، وقيمتها كتطلع ولا تهبط غير إلى كانت كتعرف تشطح أو كتغني، او كتطيب، او كتطيع راجلها وعكَوزتها، واخا الأصل هو ان الإنسان باختلاف جنسو أو عرقو أو دينو أو لونو قيمتو فذاتو وكينونتو وغير قابل للتبضيع، وهذشي طبعا غيكون فراس الشرطي المقتدر.

المشكل أن المقتطف الميزوجيني ديال سي الخراز، اللي معروف بجيب يا فم وقول، تم تداولو على نطاق واسع، وبداو المكاريب والمتخلفين والدواعش يتنمرو على العيالات ويحطو من قيمتهم كثر، خصوصا وأن الوضعية الحقوقية دالمرا فبلادنا مهمشة بزاف، ومواقع التواصل الاجتماعي عامرة بجميع أنواع اللفظي ضد المرأة، ودابا بهذ الفيديو، الخراز زاد كمل اللي بقى يخص.

الخراز خاصو يعتذر للمرأة المغربية على هذ الكلام التحقيري اللي كلو عنف وميز عنصري ضد المرأة، وخاصو يسحبو، وإلا فخاص السلطات تتحرك لوقف هذ العنف الإلكتروني ضد النساء اللي غادي وكيتزاد نهار على نهار !!

موضوعات أخرى