الرئيسية > تبركيك > هذشي كيخلع. أبو حفص ولا راسو مطلوب عند تنظيم داعش وصرح لـ”كود”: تبين لي أن الشخص اللي كيهددني بالقتل مسؤول إعلامي فداعش.. وحطيت شكاية فالموضوع
19/06/2020 16:00 تبركيك

هذشي كيخلع. أبو حفص ولا راسو مطلوب عند تنظيم داعش وصرح لـ”كود”: تبين لي أن الشخص اللي كيهددني بالقتل مسؤول إعلامي فداعش.. وحطيت شكاية فالموضوع

هذشي كيخلع. أبو حفص ولا راسو مطلوب عند تنظيم داعش وصرح لـ”كود”: تبين لي أن الشخص اللي كيهددني بالقتل مسؤول إعلامي فداعش.. وحطيت شكاية فالموضوع

عفراء علوي محمدي- كود//

من الخطير يولي “فيسبوك” مرتع ديال زعماء تنظيم الدولة الإسلامية والإرهابيين اللي كيتربصو بالناس وكيهددو سلامتهم الجسدية بشكل كبير، خصوصا منهم المتنورين ودعاة الفكر المتحرر اللي كيناهض كل مظاهر الغلو والتشدد.

اليوم محمد عبد الوهاب رفيقي، الباحث فالدراسات الإسلامية، اكتشف أن الشخص اللي كيهددو بالقتل وقطع الرأس فالصفحة ديالو ففايسبوك هو مسؤول إعلامي حقيقي فداعش يدعى “الأثير إلياس”، وبمجرد ما عرف هذشي سارع باش يحط شكاية إلكترونية فالموضوع.

وكيقول رفيقي، فتصريحو ل”كود”، بلا مايخبي درجة الاندهاش ديالو من هذشي اللي واقع: “مشيت قلبت فالمعطيات ديال هذاك الشخص وتصدمت بصراحة، حيت أنا اعتقدتو فالبداية فوكونط عادي ديال واحد من المتطرفين المغاربة اللي موالفين كنختلفو معاهم يوميا، لكن تبين لي أنه إرهابي عضو فداعش، لا بل مسؤول إعلامي، وعندو عدد من الحسابات اللي كيهدد فيها الناس وكينشر فيها الفكر الإرهابي ومنشورات وبيانات الدولة الإسلامية، وتوضعات بيه شكايات من سوريين ومن غيرهم لأنه كيهددهم بالقتل !!”.

وكشف رفيقي بللي هذ الإرهابي تجاوب مع بزاف دالناس خرين عندو فالتعليقات على واحد التدوينة دارها، كينتقد فيها عدم الترحم على المثلية المصرية اللي انتحرات مؤخرا، سارة حجازي “المشكل كان كيهدد الناس، ويطلب عنوانهم، وهوما كيعطيوه ليه على أساس أنهم ماخايفينش منو، بينما هو كيهددهم بأنهم غيلقاو نفص مصير الصحافي السوري اللي قتلاتو داعش، ناجي الجرف”، على حد قولو.

وقال رفيقي بللي من الخطير جدا  وماشي ساهل يبقاو الدواعش كينشطو فمواقع التواصل الاجتماعي بهذ الشكل، لأن هذشي كيهدد حياة الأفراد وأمنهم وسلامتهم وسلامة عائلاتهم، كيف غيمكن من شيوع الفكر الإرهابي المتطرف فصفوف العديدين.

والناشط الداعشي وضع سكرين ديال “الفايس” درفيقي فالصفحة ديالو، كيقول فيها أنه “مرتد يطالب بالترحم على ملحدة”، وكيحرض على قتلو بشكل صريح وكيقترح مكافأة لذلك ويقول “من ياتني برأسه له مائة ناقة”.

وكان سبق ل”الأثير إلياس” حط تعليقات كتخلع عند أبو حفص ففيسبوك ديالو، قالو فيها بللي “هو كافر وقتله أوجب من الصلاة” وبللي “اسمو مسجل عند الخلايا الأمنية التابعة للدولة الإسلامية وقريبا سنفطع رأسك”، وكملها وجملها وقال ليه “والله سأذبحك وأسبي زوجتك العاهرة”.

موضوعات أخرى