الرئيسية > آراء > هذشي كيبكي. حشومة تخرب وتوسخ وتسرق بلادك وتسمي راسك مواطن.. تهراس الطوبيسات فكازا ماشي جديد وديما كيجيبوهم من برا جداد وكيوليو فالمغرب فسيمانة صالحين للفوريان..
15/02/2021 16:00 آراء

هذشي كيبكي. حشومة تخرب وتوسخ وتسرق بلادك وتسمي راسك مواطن.. تهراس الطوبيسات فكازا ماشي جديد وديما كيجيبوهم من برا جداد وكيوليو فالمغرب فسيمانة صالحين للفوريان..

هذشي كيبكي. حشومة تخرب وتوسخ وتسرق بلادك وتسمي راسك مواطن.. تهراس الطوبيسات فكازا ماشي جديد وديما كيجيبوهم من برا جداد وكيوليو فالمغرب فسيمانة صالحين للفوريان..

عفراء علوي محمدي – كود كازا//

ماشي عيب تطالب الجماعة والحكومة والدولة باش يحسنو ليك وضعيتك كمواطن مغربي مقهور، عاش وعانى الفقر والبطالة والتهميش والتكرفيص، لكن حنا المغاربة عمرنا شي نهار لمنا راسنا واعترفنا أننا حتى حنا مامزيانينش، ديما العيب من المخزن والمسؤولين والمنتخبين، ديما حنا زويونين والظريفين و”سو كيوت”، والمخزن ولد الحرام مقطر ومغلي علينا ومخلي شبابنا مشوميين ومامزفتش لينا الطرقان ومابانيش لينا السبيطارات والمدارس فالقرى النائية وزيد وزيد…

راه ماشي عيب يطالب الشعب بحقوقو، لكن كيف كيقول المثل الشعبي الدارج “كون سبع وكولني”، كيفاش ممكن واحد الإنسان كيعيب على المسؤولين، وكيحملهم المسؤولية ديال جميع المصايب الكحلة اللي ضاربة هذ البلاد، وهوا شخصيا خاصو يتربى بعدا، ويبدا من راسو هو اللول، ويمارس الواجب ديالو كمواطن، عاد يشوف باش ممكن يطالب، وداك الساعة غتكون جات معاه.


دابا هذا مثال قريب وباين، ولبارح ولاية الجهة دكازا سطات بشراكة مع رئاسة الجهة ومجلس المدينة وقربشلة كاملة جايبين للكازاويين 700 طوبيس ليكس جديد كيطرطق، بداو منو 450، ودارو خطوط جداد، والركبة فيهم مريحة وبريستيج، والثمن بسيط بحال أيتها طوبيس، لكن نتا كمواطن مغربي “صالح” مايقلك راسك غير فرشخ فالبيبان والشراجم وهرس الكراسة ووسخ ودكَدكَ والطوبيس مازال ماكمل عندنا حتى ثلث أيام !!

وا الطامة الكبرى فهذ البلان، غيجيو من بعد، وبحال العادة حيت هذ السيناريو كيتعاود ديما، نفس هذ الهمج ويقليك، من دابا عام على أكثر تقدير، فاش غيوليو هذ الطوبيسات الجداد بياس ديطاشي ديال بصح بسبابهم: “وا بغينا طوبيسات مزيانين !! واحنا مكرفصين !! وا حنا مزاحمين والطوبيسات قلال !! وا العاداو !! وا اللهوماإناهذامونكار”… وا سنطيحتكم ديال الطوبيس النيت.. وا الله يعطينا وجهكم المقزدر !!


هذ القضية دالطوبيس ماشي جديدة، طوبيسات كيجيو من فرانسا والمانيا كيطرطقو، كيدخلو سيمانة بالحساب فالمغرب كيوليو ديال الفوريان، يعني أنت كمواطن مغربي “صالح”، شنو المشكل فيك؟ واش فعلا مامربيش؟ واش ضاصر؟ واش هذا عندك احتجاج؟ واش أنت مولف تهرس وتشخشخ فداركم؟ مافهمتش أنا شنو بالضبط هذ المشكل اللي عندك وفين ممكن نصنفوه !! واش مرض نفسي ولا عضوي ولا مسحور ولا ضاربة باباك الجايحة !! وباش يعجبك يقليك “وا المسؤولين..” زعلوك هذا لاواه !! سير حتى تقاد راسك عاد طالب بالحقوق حيت هذ الماركات والله حتى بزاف عليهم الحقوق !!


وهذشي وماهضرناش على هذوك اللي كيتلخمو فالونقة شرف الله قدركم، ويلوحولك الزبل فين ما جاب الله والطاروات والبركاصات موجودين، والدنيا كلها كتعمر زبولات، والمسكلة لاصقة فكاع الطروطوارات ديال الشوارع الرئيسية فجميع المدن، وحالتها ويقلك فاللخر “ماكينينش عمال النظافة !!”، وغير هذ الصباح باش مانمشيوش بعيد بانولي أخبار كثيرة كتهضر على موت الحوت اللي كاين فصهريج السواني فمكناس بسباب الزبل اللي كيتلاه فيه، والزبولات خلاص فمجاري المياه، صوا نقية صوا عادمة، راه حدث ولا حرج، وعاد هذوك المواطنين الصالحين اللي كيوسخو لينا الغابات والبحورا والطواليطات ديال المرافق العمومية والجرادي كيسرقو منهم الورد، وا الزليج اعيباد الله هو اللخر كيكَلعوه من بلاصتو فالأماكن العمومية يشيو يبيعوه، وعا البراهش اللي حضربو التران والطرام بالحجر ويتعلقو فالكاميوات، واللي كيكتبو فالحيوط والطاولات فالمدارس، وزيد وزيد !!!!

واااا هذشي كيبكي ويقطع فالقلب.. حشومة تخرب وتوسخ وتغش وتسرق بلادك وتسمي راسك مواطن !! والله حتى حشومة !!

موضوعات أخرى