عفراء علوي محمدي- كود//

رجعات العابرة جنسيا، الياقوت، تخدم بشكل عادي، اليوم الجمعة، بعدما كان جا عندها المقدم وطلب منها تخوي جماعة أمزو، اللي مشات ليها باش تخدم فقهوة بعرق كتافها.

وقالت جمعية أقليات، فالصفحة ديالها على فيسبوك، أنها تواصلات مع الياقوت، اللي أكدات ليها، اليوم الجمعة، أن مسؤول فالدرك الملكي بالجماعة جا عندها، واكد ليها انه بإمكانها تستمر فالعمل ديالها بشكل عادي، وانها مكتخالفش القانون.

وحسب الجمعية دائما، فالمسؤول ديال الجدارمية فالمنطقة حاول يطمأنها، وقال ليها أن هذشي فقط غير حيت الناس فالمنطقة مكيفهموش للأسف بحال هذ الأمور.

وشكرات الجمعية، من خلال البوسط ديالها، المسؤول الدركي فالجماعى، وشافت ان الموقف ديالو سليم وإنساني.

فنفس السياق، طالبات الياقوت السلطات المعنية باش تحميها من أي اعتداء أو اي تهديد يقدر يمس بسلامتها النفسية والجسدية، بحكم انها دبا بعد هذشي اللي وقع ولات مشهورة فالمنطقة.

ولبارح الخميس، جاو عند الياقوت مسؤولين، كيطلبو منها باش تخوي الإقليم فأقرب وقت، حيت الناس ماحاملينهاش.