كود طنجة ////

السيد لي معول عليه نزار بركة، الأمين العام لحزب الاستقلال، في منطقة الشمال غارق مشاكل.. رجل الأعمال ورئيس جماعة كزناية محمد بولعيش، لي كيعمل كل جهدو باش ما يتقدمش في ملف السطو على أراضي اليهودي، عندو ضوسي جديد خانز، وراه٬ وفق مصادر “كود”٬ تم الاستدعاء ديالو باش يستمعو له بعد شكاية ديال عدول، والقضية عاوتاني فيها التزوير والأراضي.

وكان الوكيل العام للملك بمحكمة الاستئناف بطنجة عطى الأوامر ديالو للبوليس من أجل إتمام البحث في ملف أراضي اليهودي، من بعد ما تخلف العديد من المشتكى بهم وبينهم هاذ بولعيش عن الحضور للتقدم أمام الوكيل العام، هاذشي كان الأربعاء الفايت الأربعاء 05 مارس 2025.

الضوسي كبير وخانز، وفيه إضافة إلى بولعيش النائب الأول ديالو والعديد من المنتخبين الآخرين وشي عدولات، والتهم الموجهة لهاذو تكوين عصابة إجرامية، والتزوير، والترامي على ملك الغير، والبناء فوقه، والتجزيء السري. وكان الوكيل العام للملك بطنجة عطى الأوامر ديالو للفرقة الوطنية للتحقيق في الملف، بعد ما توصل بوثائق بينها حكم قضائي صادر عن قاض بالقسم العبري بالمحكمة الابتدائية يقر بملكية المواطن اليهودي لـ 11 بقعة أرضية بكزناية، واللي اكتاشف من بعد ما رجع لأرض الوطن أنها طارت وشي منتخبين دارو لها ميسة.

وبالرغم من الاستماع له في هاذ الملف يصر رئيس جماعة كزناية محمد بولعيش على أن ما عندو علاقة بالملف، وأن الأمر تم قبل ما يتولى هو المسؤولية. وخا سيدي حنا تيقناك، ولكن الشكاية الجديدة لي استدعاوك فيها ياك ما غادي تقول لنا حتى هي تشابه أسماء.

مصادر “كود” قالت بلي السيد كيعمل كل ما في جهدو باش ما يتقدمش في القضية ديال أراضي اليهودي، وكيحاول يبعد عليه الشبهة حيث قالك هو رجل أعمال وسياسي وهاذشي غادي يأثر على مستقبله.