كود – وكالات//

بائع سيارات بلجيكي رجع أمير على 26 عام، من بعد ما تعترف به رسمياً على أنه ولد الأمير لوران، خو الملك فيليب.

كليمنت فاندنكيركوف، تزاد فغشت 2000، وهو ولد المغنية البلجيكية ويندي فان وانتن، واللي كانت عندها علاقة مع الأمير لوران فالتسعينيات. ولكن الأم ما قالتش لكليمنت شكون هو الأب ديالو حتى وصل لـ16 عام.

ومن بعد سنوات، تأكدات الأبوة عن طريق تحليل الحمض النووي، قبل ما يتم الاعتراف به رسمياً كولد للأمير لوران، اللي عندو 63 عام، فإجراء بسيط تدار فقاعة البلدية قبل ستة شهور.

وحسب صحيفة التلغراف، الأمير لوران سجّل الأبوة ديالو لفائدة فاندنكيركوف فالسجل المدني البلجيكي، وهاد الاعتراف عطاه نفس حقوق الإرث فالممتلكات الخاصة ديال باه بحال خوتو من الأب، الأميرة لويز، والأمير نيكولاس، والأمير أيمريك.

ولكن وخا أنه ولى رسمياً أمير، فاندنكيركوف ما غاديش يستافد من المخصصات المالية الملكية، وما غاديش تكون عندو مهام رسمية، كما أنه ما عندوش حتى حق فالعرش البلجيكي.

ومن الناحية العائلية، يقدر ياخد اسم العائلة الملكية ديال باه، ساكس-كوبورغ، ولكن هو ما باينش باغي يتخلى على اسم عائلتو الحالي.

وقال فتصريح لصحيفة هيت نيوسبلاد الفلمنكية: «أنا فخور باسم فاندنكيركوف. إلا تخليت عليه، غادي نحس بحال إلا خنت كلشي لي دارتو ماما على قبلي».

وكانت ويندي فان وانتن، واسمها الحقيقي إيريس فاندنكيركوف، تعرفات على الأمير لوران بالصدفة فواحد عرض أزياء فباريس فالتسعينيات، العلاقة بيناتهم ما طولاش، حيث الملك ألبرت الثاني، بات لوران، ما كانش موافق على هاد العلاقة.

ومن بعدما شاعت لخبار تاصل كليمنت بلوران وقال ليه شنو قالت ليه الأم ديالو، ووافق الأمير يدير تحليل الحمض النووي باش يتأكد من النسب.

وقال كليمنت إنه مشى مع باه لسبيطار باش يديرو التحليل، وكيذكر أن لوران قال ليه: «غادي ندخل أنا الأول باش تحس بالراحة».

ومن بعد ما تأكدات الأبوة، قال كليمنت بلي العلاقة بينو وبين باه ولات مبنية على «نقاشات مفتوحة وصريحة».

وماشي أول مرة كيخرج سر عائلي مرتبط بالعائلة الملكية البلجيكية. فوالد الأمير لوران، الملك السابق ألبرت الثاني، عاش حتى هو لسنوات فمعركة قانونية بسبب بنتو تولدات خارج علاقة الزواج، قبل ما يعترف بها رسمياً سنة 2020.

هاد البنت هي دلفين بويل، اللي عندها دابا 58 عام، وربحات المعركة القانونية ديالها، وولات رسمياً أميرة، وكتستعمل حالياً اسم دلفين دي ساكس-كوبورغ.