كود -وكالات//

لغات المحكمة الفيدرالية فمانهاتن، لبارح الجمعة، قرار كانت دارتو إدارة الرئيس الأمريكي دونالد ترامب، واللي كان كيوقف إصدار تأشيرات الهجرة لمواطنين ديال 75 دولة.

القاضية جانيت فارغاس اعتابرات أن هاد السياسة اللي دارتها وزارة الخارجية كتفوت الصلاحيات القانونية اللي عند وزير الخارجية ماركو روبيو.

وقالت القاضية بلي القرار اللي تعلن فشهر يناير كيتعارض بشكل كبير مع قانون الهجرة الفيدرالي، اللي كيحدد الصلاحيات ديال وزير الخارجية فيما يتعلق بالإجراءات اللي كيديروها الموظفين القنصليين فملفات تأشيرات الهجرة.

هاد التعليق كان كيشمل مواطنين من عدد من الدول فـأمريكا اللاتينية، والبلقان، وجنوب آسيا، إضافة لدول إفريقية ومن الشرق الأوسط ومنطقة الكاريبي.

وزارة الخارجية الأمريكية كانت بررات هاد الإجراء بكون مواطني هاد الدول ممكن يشكلو، حسب تقديرها، عبئاً على الموارد الحكومية داخل الولايات المتحدة.

الحكم جا من بعد دعوى قضائية رفعاتها منظمات كتهتم بحقوق المهاجرين، بمعية عدد من طالبي التأشيرات ومواطنين أمريكيين كيكفلو أفراد من عائلاتهم فالدول اللي شملها القرار.