وكالات//

تعرضات واحد الحافلة اللي كانت دايرة جولة سياحية وبداخلها سياح أجانب فتركيا، لهجوم من طرف خمسة أشخاص، وهم دايزين فطريق بمنطقة سياحية، الشي اللي خلّى الركاب يتخلعو وهم كيشوفو المهاجمين كيسدو عليهم وكيهرسو الزجاج باش يوصلو للسائق.

فيديو كيبين تفاصيل صادمة، فيه الركاب كيغوتو من الرعب، والمهاجمين حاصرو الحافلة حيت كانوا معصبين من السائق بسباب خلاف على أسبقية المرور، فواحد الولاية سميتها “آيدين” فغرب تركيا.

وسائل إعلام تركية قالت بللي البارح الثلاثاء، كان سائق واحد الطوموبيل كيضارب مع سائق الحافلة، وعيط على خوتو وناس من عائلتو، وجاو وبلوكاو الطريق قدّام الحافلة بثلاثة ديال الطوموبيلات.

وبداو المهاجمين كيهرسو زجاج الحافلة باش يقتاحموها، حيث السائق سد الباب عليهم باش يحمي راسو، ولكن ما نفعوش، وتعرض فعلاً للاعتداء قدّام السياح اللي كانوا جايين من جوج ديال الفنادق كبار من صنف خمس نجوم.