كود سبور//

غادي يبدا الناخب الوطني السابق بادو الزاكي العمل ديالو بشكل رسمي اليوم الاثنين، كمدرب بالبطولة التونسية من بعدما اختار يغير الأجواء ويخوض تجربة جديدة خارج المغرب بعد ظروف صعبة مر منها بداية هذا الموسم.

بادو الزاكي صاحب المشوار الكروي المحترم سواء كحارس مرمى أسطوري فالكرة المغربية أو كمدرب سابق للمنتخب الوطني المغربي أو لفريق الوداد الرياضي، ومن بعدما سنا عقد مع فريق هلال الشابة التونسي غادي يبدا العمل ديالو كمدرب له بصفة رسمية اليوم الاثنين من خلال أول حصة تدريبية واللي غادي تنطلق مع 2 ديال لعشية.

ومن بعدما غادي تسالي أول حصة تدريبية لبادو الزاكي مع فرقتو الجديدة هلال الشابة التونسي، غادي يشرف المدرب المغربي على معسكر تدريبي للفريق واللي غادي يكون مغلق فمدينة سوسة التونسية الساحلية.

وكان الإطار الوطني بادو الزاكي اختار تغيير الأجواء والخروج من المغرب لخوض تجربة جديدة وفضل يتعاقد مع فريق هلال الشابة التونسي وهو فريق ما عندوش ضغط بالمقارنة مع الفرق اللي كان كيدربها فالسابق، مع العلم أن الزاكي مر من ظروف صعبة بزاف بداية هذا الموسم وقاسية على أي مدرب ممكن يكون فبلاصتو حيث توفيت له الزوجة ديالو والشي اللي خلاه يغيب على اولى مباريات فريق اتحاد طنجة اللي سنا معه الصيف الماضي، ومن بعد منها قررت إدارة الفريق الطنجاوي تنفصل عليه بسبب النتائج السلبية.