الرئيسية > آراء > ها ودني منكم !آ دوك الظلاميين لي عندنا فالمغرب و لي كايديرو الخدمة ديال الحياحة ! و كايضلو يكفرو فالمثقفين و الكتاب و الممثلات و الصحفيين و دوزام! راه فحالكم لي كايتسبب فالكوارث و غدا لاطرا شي عمل ارهابي راكم مسؤولين مباشرين عليه!
21/10/2020 15:00 آراء

ها ودني منكم !آ دوك الظلاميين لي عندنا فالمغرب و لي كايديرو الخدمة ديال الحياحة ! و كايضلو يكفرو فالمثقفين و الكتاب و الممثلات و الصحفيين و دوزام! راه فحالكم لي كايتسبب فالكوارث و غدا لاطرا شي عمل ارهابي راكم مسؤولين مباشرين عليه!

ها ودني منكم !آ دوك الظلاميين لي عندنا فالمغرب و لي كايديرو الخدمة ديال الحياحة ! و كايضلو يكفرو فالمثقفين و الكتاب و الممثلات و الصحفيين و دوزام! راه فحالكم لي كايتسبب فالكوارث و غدا لاطرا شي عمل ارهابي راكم مسؤولين مباشرين عليه!

سهام البارودي – كود//

هاد الصباح لقيت فواحد الگروب نسائي وحدة حاطة واحد المنشور ديال واحد الباج و كاتغوت واك واك آ البنات نوضو سينياليو هاد الباج راه كايعايرو الدين ديالنا ! فاش طليت نشوف لقيتو منشور فيه شي نكت كايبداو بديك ” قاليك هذا واحد مات و طلع عند الله” نكت فحال بزاف د النكت كانعاودوهم و كايتعاودو فالعالم كامل ! و فاش قلت ليها آ لالة الشريفة راه هادشي داخل فنطاق حرية التعبير و هادشي لي كاديري فيه راه معنيتو انك باغا تحرمي عباد الله من انها تعبر كيما بغات و انه الفايسبوك كايعطيك الحق تسينيالي فحالات واضحة و باينة ” البيدوفيليا ! منشور فيه الكراهية او العنصرية! العرا …” ماشي لي ماتافقناش عليه نوضو نسينياليوه ! السينيال فالافتراضي راه هوا قطع الرؤوس فالواقع ماكاينش فرق ! ولكن مع الاسف الاغلبية ديال العاقيسات مافاهمينش شنو هي حرية التعبير!

للاسف بزاف د المسلمين كايصحابهم راه غي حيت هوما مآمنين بشي حاجة راه عباد الله ماعندهمش الحق يضحكو على ديك الحاجة مثلا او ينتاقدوها او يديرو عليها كاريكاتور او نكتة ! و شحال من مرة ناض الصداع فالمغرب على أمور من هذا القبيل فحال نهار دازو شي مقاطع من مسرحية كفر ناعوم لطيفة احرار و ناضو الاسلاميين كايشعلو العافية فواسائل التواصل الاجتماعي باغين يعلقو السيدة من رجليها و يسوطوها فالساحات العامة !

دابا نتخايلو كاملين انه غدا الهندوس لي كايشكلو واحد مليار و الصرف فالعالم و لي عندهم البقرة رمز من الرموز المهمة فالديانة ديالهم و من المقدسات ! ينوضو يخرجو يغوتو علينا لاحقا سدو المطاعم و السناكات و المجازر لي كادبحو فيها واحد من المقدسات عندنا ! حتارمونا ! ماذبحوش البگر ! كولو الدجاج ! و يسينيالو الباجات ديال ماكدو و برغر كينغ و يهرسو الجاج ديال الگزارة واش ماشي قمة الحماق هادي ؟!

كاين ناس كايقدسو الطوبات و الفيران و دايرين ليهم معابد و مآمنين بيهم ! واش تاهوما عندهم الحق يتشكاو لاشافو شي كاريكاتور كايصور المقدس ديالهم و لا شي رسوم و لا طابلو و لا فيلم فحال لي وقع للمخرج فانكوخ لي قتلو ارهابي فألمانيا ! واش اذا غذا خرجات شي طائفة كاتقدس خيزو غانحبسو الاستهلاك د خيزو و كيكة خيزو ؟ و نمنعو رسوم bunny bugs !

المقدس ديالك راه مقدس غي عندك بوحدك خاصك تتعلم انه من حق الناس انها تضحك عليه و تستهزأ منو و ترسمو و دير عليه اعمال ابداعية كيما هي باغا حيت هادشي داخل فنطاق حرية التعبير ! و ديك الهضرة ديال “الاحترام” راه ماعندها حتى معنى حيت شنو بغيتي عباد الله يحتارمو ؟! شي حاجة ماكايآمنوش بيها واش نتا مسطي؟!

الناس كايضلو يضحكو و يحطو فالنكت على اليهود و فالكاريكاتورات على خيسوس و البابا و الكنيسة و بزاف د المقدسات د البعض و لكن ماعمري سمعت شينصراني ذبح شي رسام حيت رسم كاريكاتور على عيسى !؟ و لا شي مخرج حيت دار عليه فيلم ؟! و لا شي ممثلة حيت ضحكات عليه ؟! هادشي منتاشر عندنا غي حنا!

فالمغرب بزاف د الظلاميين كايساهمو بشكل كبير فنشر الكراهية! و كايحاربو حرية التعبير ! باجاتهم عامرة بالتكفير د الصحافيين و المثقفين و الممثلات و حتى القنوات التلفزية و غدا ولا بعدو لاطرا شي عمل ارهابي فحق شي واحد فيهم راه كانشوف بلي هادوك الظلاميين غايكونو مسؤولين مباشرين عليه!

موضوعات أخرى